Ин пешниҳод дар ҳоле садо дод, ки рӯзи 3 январ вазирони тандурустии кишварҳои узви Иттиҳоди Аврупо мулоқот мекунанд. Роҳбари комисияи Иттиҳоди Аврупо дар масъалаи ҳифзи тандурустӣ Стелла Кириакидес гуфт, мехоҳад барои эҳтимоли мавҷи нави вабои коронавирус "посухи аврупоӣ" таҳия кунад.
Кишварҳои узви Иттиҳоди Аврупо захираи зиёди воксини зидди коронавирус доранд. Пекин ҳанӯз ба ин пешниҳоди Иттиҳод посухе надодааст.
Дар Чин пештар аз воксинҳои истеҳсоли дохилӣ - Sinovac ва Sinopharm истифода карданд ва воксинҳои хориҷиро қабул накарданд. Созмони ҷаҳонии тандурустӣ рӯзи 21 декабри соли 2022 гуфта буд, ки воксинзанӣ дар Чин ба қадри кофӣ сурат намегирад.
Ба далели мавҷи нави COVID-19 дар Чин дар чанде аз кишварҳои дигар, аз ҷумла Италия, ИМА, Ҷопон, Ҳинд ва Малайзия барои мусофироне ташхиси коронавирусро ҳатмӣ карданд, ки аз Чин бармегарданд.
Баъди эътирозҳои зидди локдаун мақомоти Чин дар моҳи декабри соли 2022 ҳамаи маҳдудиятҳои марбут ба пешгирӣ аз паҳншавии коронавирусро бекор карданд. Баъди ин тасмим гирифторӣ дар он кишвар якбора боло рафт. Беморхонаҳои Чин аз гирифторони коронавирус пур шудааст.