Бу ҳақда Гершкович ишлаган The Wall Street Journal газетаси бош муҳаррири Эмма Такер нашр ходимларига йўллаган хатида маълум қилган, дея хабар қилди Reuters.
“Эваннинг саломатчилиги жойида ва у бутун дунёдан келаётган дастак учун миннатдор”, деб ёзган Такер.
Хат матнида Эваннинг оиласи “у билан ниҳоят алоқа ўрнатилганини билиб, енгил тин олган”и ҳам айтилган. Такер адвокатлар билан учрашув унга қанот бахш этганини қўшимча қилган.
Гершкович ўз адвокатлари орқали қўлга олиниши юзасидан шикоят аризаси киритган. Оқ уй Байден маъмурияти журналистнинг озод этилиши учун барча чоралар ишга солинаётганини билдирган.
The Wall Street Journal журналист Эван Гершкович 30 март куни Екатеринбургда қўлга олинган эди. Кейинроқ Москвадаги Лефортово туман суди уни икки ойга ҳибсга олиш ҳақида қарор чиқарган. Гершковичга қарши жосуслик бўйича жиноят иши очилган. Россиялик терговчилар иддаосича, Гершкович АҚШ буюртмаси бўйича Россиядаги ҳарбий-саноат мажмуаси корхоналаридан бири ҳақида махфий маълумотларни йиғиб юрган. Айбловга оид бошқа тафсилотлар келтирилаётгани йўқ.
Жосуслик айблови бўйича журналист 12 йилдан 20 йилгача муддатга озодликдан маҳрум этилиши мумкин.
Аввалроқ журналистнинг адвокати Даниил Берман суд залига қўйилмаган, ваҳоланки унда Гершковиянинг манфаатларини ҳимоя қилиш учун ордер бўлган.
Қарийб олти йилдан буён Москвада яшаб келаётган Эван Гершкович сўнгги пайтларда АҚШда чиқадиган The Wall Street Journal газетасида ишлаб, Россия ва Украинадаги воқеаларни ёритиб келаётган эди. WSJгача у France-Presse агентлиги, The Moscow Times ва The New York Times нашрларида ишлаган. Гершкович муаллифи бўлган сўнгги мақолани The Wall Street Journal шу йилнинг 28 мартида чоп қилган эди.
Аввалроқ Озодлик Россиядаги мустақил нашрлар журналистлари ва жамоат арбоблари Эван Гершковични озод қилиш чақириғи билан очиқ хат ёйинлашгани ҳақида хабар қилганди. Хат муаллифлари Гершковичга қўйилаётган жосуслик айбловини асоссиз деб билишлари ва бунга ишонмасликларини қайд этишган эди.