Ссылки доступа

АҚШ Давлат котиби ва Мудофаа вазири Киевга ташриф буюрди


АҚШ Давлат котиби Энтони Блинкен ва Мудофаа вазири Ллойд Остин якшанба куни Киевга ташриф буюриб, Украина президенти Владимир Зеленский билан музокара ўтказди.

Ташриф ҳақидаги хабарларни душанба куни эрталаб Зеленский ҳам, Украинани тарк этиб, Варшавага етиб борган АҚШ расмийлари ҳам тасдиқлашди.

Бу Россиянинг Украинага кенг миқёсли бостириб кириши бошланганидан бери Америка вакилларининг бундай юқори даражадаги биринчи ташрифидир. Ташриф матбуотда ёритилмаган, Америка томони бу ҳақда олдиндан хабар бермаган, бироқ Зеленский бу ҳақда шанба куни бўлиб ўтган матбуот анжуманида маълум қилган.

Украина Мудофаа вазирлиги ва Ташқи ишлар вазирлиги раҳбарлари ҳамда унинг Қуролли кучлари қўмондони иштирок этган учрашув бошланиши акс этган видео эълон қилинди.

Варшавада сўзлаган Блинкен Украина ўз мақсадларига эриша олмаётган Россияга қарши урушда «муваффақиятли» эканлигига ишонишини айтди. Давлат котибининг сўзларига кўра, мустақил Украина «Владимир Путиндан анча узоқроқ яшайди».

Блинкеннинг сўзларига кўра, ташрифдан кўзланган асосий мақсад Қўшма Штатлар Украина ҳукумати ва унинг халқини юқори даражада қўллаб-қувватлаётганини кўрсатиш эди. Остин Киевга ҳужумни қайтарган Украина қўшинларининг ҳаракатларини ажойиб деб атади.

Ташриф натижасида АҚШ Украинага янги ҳарбий ёрдам пакети учун 300 миллион доллардан ортиқ маблағ ажратиши маълум қилинди. АҚШ элчихонасининг Лвовдан Киевга қайтарилиши эҳтимоли ҳам муҳокама қилинди.

Уруш бошлангандан бери Қўшма Штатлар ва унинг иттифоқчилари Россияга қарши бир нечта санкциялар пакетини жорий қилди, шунингдек, Украинани қурол-яроғ билан таъминлади, уларнинг турлари доимий равишда кенгайиб бормоқда.

Материалы по теме

XS
SM
MD
LG