ҲАМАС Ғазода бир ҳафталик оташкесим ўрнатиш ҳақидаги Исроилнинг таклифини рад этди.
The Wall Street Journal нашри билдиришича, ҲАМАС рад жавобини музокараларда воситачилик қилаётган Миср вакиллари орқали етказган.
Исроил оташкесим эвазига ҲАМАСдан яна 40 кишини гаровдан бўшатишни талаб қилган эди. Исроил бунинг эвазига оғир жиноятларда айбланиб қамоқларда сақланаётган бир қатор фаластинликларни озод қилиши мумкинлигини билдирган.
ҲАМАС гаровдагиларни озод қилиш юзасидан музокараларни бошлаш аввалида Исроилдан ўт отишни тўхтатишни ҳамда Исроил қўшинларини Ғазо бўлгасидан олиб чиқишни талаб қилган.
Аввалроқ “Моссад” раҳбари Давид Барнеа “ҲАМАС урушни тўхтатмоқчи бўлса” таслимга кўниши ва Исроилга 7 октябрдаги ҳужум учун масъул бўлган ўз лидерларни топшириши кераклигини айтган эди.
Ноябрь охирида ҲАМАС билан келишилган оташкесим шартномасига асосан гаровга олинган исроилликлардан 105 нафари бўшатилган.