Ссылки доступа

Қозоқ ширкатлари Россияга санкцияланган маҳсулотларни етказиб бераётгани ошкор бўлди


Журналистлар санкцияларни четлаб Россияга юқори технологик маҳсулотларни етказиб беришнинг яна бир схемасини фош қилди.

Уюшган жиноятчилик ва коррупция тадқиқоти маркази (OCCRP), «Бюро медиа» (Беларус) ва «Вёрстка» (Россия)нашрларининг қўшма суриштирувига кўра, "сохта транзит"да Қозоғистон ва Беларус ширкатлари ҳам иштирок этган.

Ҳарбий саноати учун муҳим бўлмиш юқори технологик ускуналарни санкцияларни четлаб Россияга келтириш схемаси Қозоғистон ҳам, Беларус ҳам Евроосиё иқтисодий иттифоқига аъзо бўлганлиги учун мумкин бўлган. Иттифоқ ҳудудида товарлар божхона текширувисиз чегарадан эркин ўтади. Бу икки давлат Россиянинг энг яқин иқтисодий ҳамкори ҳисобланади.

Тақиқланган технологияларни Россияга етказиб бериш шундай ташкил этилганки, бу махсулотлар баъзан Қозоғистон ҳудудига ҳам келтирилмаган. Қозоқ ширкати Европадан яримўтказгичлар ишлаб чиқариш учун зарур бўлган юқори технологик ускуналарга буюртма берган, ускуналар эса "вақтинчалик сақлаш" учун Беларусга етказилган. Беларусдан эса ускуналар тўғридан-тўғри Россияга йўл олган. Шу тариқа Россияга берилиши тақиқланган тахминан 5,9 миллион долларлик юқори технологик товарлар етказилган.

Бу махсулотлар Россия армиясига, жумладан Точка-У ва Искандар-М ракета тизимларини ишлаб чиқарувчисига хизмат кўрсатаётган "Остек" конгломератига етказилган. Айнан "Остек" Украинага ташланаётган бомбаларни ишлаб чиқарувчи Москва Марказий кимё ва механика илмий-тадқиқот институти тендерларида ҳам ғолиб чиққан.

"Остек" компаниясига санкцияланган махсулотлар Европадан беларус тадбиркори Евгений Костюкга тегишли транспорт компаниялари орқали келтирилган. Костюк Қозоғистонда ҳам бир неча ширкатга эгалик қилади.

Қозоғистон ва Кремлнинг бошқа иттифоқчилари орқали Россияга тақиқланган маҳсулотлар етказилиши илк бор фош қилинмаяпти. Ўтган йилнинг март ойида «Важные истории», Der Spiegel, Organized Crime and Corruption Reporting Project ҳамда «Власть» нашри Қозоғистонда рўйхатдан ўтган ширкатлар орқали Россияга миллионлаб долларлик дронлар ва электрон компонентлар етказилгани ҳақида ёзган эди.

Қозоғистон ҳукумати Россияга жуфт мақсадли товарлар ва ҳарбий маҳсулот реэкспорт қилинаётганини доимо рад этиб келган.

XS
SM
MD
LG