Ссылки доступа

Иран Украинаның Қырым мен тағы төрт өңірінің аннексиясын мойындамайды


Әмір Абдоллахиян

Иран Украинаның Қырым мен тағы төрт өңірінің аннексиясын мойындамайды, деп мәлімдеді Иран сыртқы істер министрі Хосейн Әмір Абдоллахиян TRT World түрік телеарнасына берген сұқбатында.

"Біз мемлекет егемендігі мен аумағының тұтастығын халықаралық заңдар бойынша танимыз, Теһран мен Мәскеу қарым-қатынасы жақсы екеніне қарамастан, біз Қырымның, Луганск мен Донецк облыстарының Украинадан бөлінуін мойындамадық", – деп мәлімдеді Абдоллахиян.

Оның айтуынша, Иран билігі сыртқы саясаттағы "бірізді ұстанымында" тұрады. "Украинадағы жанжал - шешім емес деп мәлімдеген уақытта біз саяси ұстанымымыздың дұрыс екеніне сенімдіміз", - дейді министр.

Бұның алдында ақпарат құралдары Ресей Украинадағы соғыста қолданып жүрген ұшқышсыз ұшақтарды Ираннан алады деп бірнеше мәрте хабарлаған. Киев Мәскеуді иран дрондарын азаматтық нысандарды шабуылдауға қолданды деп айыптап отыр.

2022 жылғы қарашада Ира Ресейге қашықтан басқарылатын ұшақтар бергенін алғаш рет мойындады, бірақ оларды Украинадағы соғыс басталғанға дейін жеткізгенін айтты. Ресей иран қаруын қолданды деген айыптауды жоққа шығарып отыр.

Ресей Қырымды 2014 жылы аннексиялады. 2022 жылғы қыркүйекте Ресей президенті Владимир Путин Украинаның Херсон, Запорожье, Донецк және Луганск облыстарын аннексиялағанын жариялады.

Киев пен батыс елдері аннексияны ешқашан мойындамайтынын алдын ала мәлімдеген. Украина Ресей басып алған жерлерді қайтару үшін қарумен күресетінін ескерткен.

XS
SM
MD
LG