Исроил бош вазири Бинямин Нетаняху гаровга олинган исроилликларни озод қилиш учун Ғазо секторидаги жанговар ҳаракатларни олти ҳафтага тўхтатишга тайёрлигини айтди.
“Исроил гаровга олинганларни қайтариш учун ҳарбий ҳаракатларни 42 кунга тўхтатиши мумкин. Аммо биз урушни тўхтата олмаймиз. Эронликлар ва қолган барча душманларимиз таслим бўлишимизни кутиб турибди”, — деди бош вазир парламентнинг ташқи ишлар ва мудофаа бўйича комиссиясининг ёпиқ йиғилишида.
Times of Israel нашрининг аниқлик киритишича, шу тарзда Нетаняху АҚШ президенти Жо Байденнинг можарони ҳал қилиш режасига муносабат билдирди. Исроил бош вазирига кўра, Америка президентининг режасида «бўшлиқлар» талайгина.
"Байден тақдим этган режа тўлиқ эмас эди. Гаровга олинганларни қайтариш учун уруш тўхтайди, кейин яна гаплашамиз. АҚШ президенти оммага тақдим этмаган бошқа тафсилотлар ҳам бор”, — дея қўшимча қилди бош вазир.
АҚШ президенти Жо Байден 31 май куни Ғазо секторида ўт очишни тўхтатиш ва исроиллик гаровга олинганларни озод қилиш бўйича янги режани тақдим этди. Режа деэскалациянинг уч босқичи, асосан, доимий сулҳ ва Исроилнинг Фаластин ҳудудидан чиқиб кетишини ўз ичига олади.
Режага кўра, биринчи босқич олти ҳафта давом этиши керак. Унда тўлиқ ва якуний ўт очишни тўхтатиш, Исроил қўшинларининг Ғазо секторидаги аҳоли пунктларидан олиб чиқиб кетилиши ва юзлаб фаластинлик маҳбусларни озод қилиш эвазига бир қатор исроиллик гаровга олинганларни қайтариш киради. Иккинчи босқич ҳарбий ҳаракатларни якуний тўхтатиш ва Исроил қўшинларини Ғазо секторидан олиб чиқиб кетишни ўз ичига олади. Бундан ташқари, бу босқичда қолган барча гаровга олинганлар Исроилга қайтарилиши керак. Ниҳоят, учинчи босқичда АҚШ ва халқаро ҳамжамият кўмагида минтақани кенг кўламли қайта қуриш режаси бошланади, бу эса 3-5 йил давом этади. ҲАМАС томонидан ўлдирилганларнинг жасад қолдиқлари исроиллик оилаларга қайтарилиши керак.
Исроил АҚШ президенти Жо Байденнинг Ғазо секторида оташкесим режасининг асосий шартларига рози бўлди. Нетаняхунинг коалициядаги ўнгчи ҳамкорлари, Молия вазири Безалел Смотрих ва Миллий хавфсизлик вазири Итамар Бен-Гвир, ҲАМАСга нисбатан қаттиққўл бўлмаган ҳар қандай келишувга норозилик сифатида ҳукуматни тарк этиш билан таҳдид қилган. Исроил мухолифати етакчиси Яир Лапид Байденнинг режасини қўллаб-қувватлади.
Жо Байден ўт очишни тўхтатиш режаси Қатар воситачилари орқали ҲАМАС гуруҳи вакилларига берилганини айтди. Америка президенти ҲАМАСни бу таклифни қабул қилишга чақирди. Шу билан бирга, у исроиллик сиёсатчиларга ҳам мурожаат қилди. ҲАМАС Байден тақдим этган келишувни олқишлаган. Гуруҳ вакилларининг сўзларига кўра, агар Исроил «бу борада аниқ мажбуриятини билдирса», улар доимий ўт очишни тўхтатиш ва Исроил қўшинларини Ғазо секторидан тўлиқ олиб чиқишга асосланган ҳар қандай таклифга «конструктив муносабатда бўлишга» тайёр.
Евроиттифоқ ва БМТ оташкесим режасини қўллаб-қувватламоқда.
Исроил бош вазири Бинямин Нетаняху Жо Байденнинг Ғазо секторида оташкесим режасига муносабат билдирди.