Ссылки доступа

Қирғиз санъаткори Викрам Рузахунов иши бўйича Олмаота ИИБ собиқ ўринбосари ҳам ҳибсга олинди


Викрам Рузахунов
Викрам Рузахунов

Викрам Рузахунов қийноқлар остида давлат телеканалига “Қозоғистонга вазиятни издан чиқариш учун келганини ва бунинг учун 200 доллар ҳақ олганини” айтишга мажбур бўлган.

Қозоғистондаги "январь воқеалари"да қирғиз санъаткори Викрам Рузахунов қийноққа солинганлиги иши бўйича Олмаота ИИБ раҳбари собиқ ўринбосари Берик Абилбеков ҳибсга олинди. Бу ҳақда Бош прокуратура маълум қилди.

Аввалроқ 2022 йилдаги "январь воқеалари" пайтида асоссиз равишда қўлга олинган қирғизистонлик жаз пианисти Викрам Рузахуновни қийноққа солган 4 нафар қозоқ полициячиси ҳибсга олинган эди.

Бош прокуратура ўшанда тергов "мантиқий якунигача олиб борилади, бу тўрт жиноятчини ушланиши фақатгина бошланишдир” деб ишонтирган эди.

Машҳур мусиқачи, пианист Викрам Рузахунов 2022 йилнинг 8 январида Олмаотада "фитна уюштиришга ёлланган хорижлик" сифатида қўлга олинган. У қийноқлар остида давлат телеканалига “Қозоғистонга вазиятни издан чиқариш учун келганини ва бунинг учун 200 доллар ҳақ олганини” айтишга мажбур бўлган.


Мана шу интервью эълон қилинганидан сўнг, қирғиз ва қозоқ жамоатчилиги машҳур мусиқачини таниб қолган. Бунинг ортидан қозоқ полицияси Қирғизистон ҳукумати талаби билан уни қамоқдан бўшатишга мажбур бўлган. Викрам Рузахуновни қийноққа солган қозоқ полициячиларига нисбатан Қозоғистон Жиноят кодексининг 146-моддаси (қийноқ) асосида жиноят иши қўзғатилган, бироқ 2022 йилнинг май ойида мусиқачи Олмаотадаги тергов ҳаракатларида иштирок этмаганлиги важи билан иш тўхтатилган эди.

Рузахуновни сўроқ қилган қозоқ ҳуқуқ-тартибот идоралари ходимлари унинг қовурғаларини синдирган. Ҳуқуқбонларнинг айтишича, у билан бирга 100 нафарга яқин марказий осиёлик, жумладан ўзбек муҳожирлари қийноққа солинган.

2022 йилнинг январида содир бўлган қонли воқеаларга нарх-наво қимматлашгани ва турмуш даражаси пасайиши сабаб бўлган эди. Суюлтирилган газ нархини тушириш талаби билан Қозоғистон ғарбида бошланган норозилик акциялари мамлакатнинг деярли барча шаҳарларини қамраб олган умуммиллий намойишларга айланиб кетди. Бироқ тинч митинглар тўрт кундан сўнг бебошликлар ва қон тўкилиши билан якун топди. Қозоғистон илтимоси билан мамлакатга КХШТ кучлари киритилган эди.

Қозоғистон президенти Тоқаев чет элда етиштирилган аллақандай “террорчилар” мамлакатга ҳужум қилгани ва ҳокимиятни босиб олишга уринганини иддао қилди. Аммо у ўз иддаосини тасдиқлайдиган бирон бир ишончли далилни кўрсатгани йўқ.

XS
SM
MD
LG