Қозоғистонда Ал-Фаробий номидаги Қозоғистон Миллий университети талабаларининг шахсий маълумотлари ва тиббий кўрик натижалари ижтимоий тармоқларда тарқалиб кетди.
Университетда ички ички тергов бошлади, прокуратура шахсий дахлсизликни бузганлик бўйича жиноий иш қўзғатди. Бу ҳақда Озодлик радиосининг қозоқ хизмати ёзмоқда.
Интернетга чиқиб кетган жадвалда, жумладан, қизларнинг исми шарифи, солиқ тўловчининг идентификация рақами, телефон рақамлари ва тиббий ташхислари кўрсатилган. Улар бокира эканлиги/эмаслиги алоҳида қайд этилган.
Қизларнинг шахсий маълумотларининг сиздирилиши қозоқ жамиятини жунбушга келтирди. НеМолчиКЗ жамғармаси раҳбари Дина Смаилова буни шахсий дахлсизликнинг жиддий бузилиши деб баҳолади. "Ҳеч кимнинг бокираликка текширишга ҳаққи йўқ. Бу маълумотни кейин нима қиласизлар, кимга юборасизлар, бокира талабаларга ким шунчалик қизиқяпти?", деб ёзди у ўзининг Телеграм-каналида.
Университетнинг тушунтиришича, университетга шартнома асосида тиббий хизмат кўрсатувчи тиббиёт марказининг ҳамшираси Whatsup орқали флюрография текширувидан ўтиши керак бўлган 200 га яқин 3- ва 4-курс талабалари рўйхатини деканатга юборган. Деканат эса ушбу рўйхатни гуруҳ раҳбарларига ижро учун қайта юборган. Шу орқали ушбу маълумотлар ижтимоий тармоқларга чиқиб кетган.
Айтишларича, рўйхатдаги баъзи талаба қизларга ижтимоий тармоқларда аллақачон ножўя таклифлар ва таҳдидлар қилинмоқда.
Олий таълим вазири Саясат Нурбек бу масала назоратга олинганини, талаба қизларнинг тиббий маълумотларини тарқатишда айбдорлар қонунчиликка мувофиқ жазоланишини айтган.