Швейцарияда бўлиб ўтадиган Украинадаги урушни тўхтатиш шартларини муҳокамаси Хитой иштирокисиз ўтади. Швейцариянинг Бюргеншток курортида 15-16 июнь кунлари бўлиб ўтадиган "тинчлик саммитига" Хитой ўз вакилларини юбормайди, деб хабар бермоқда Reuters агентлиги.
Агентлик манбаларининг айтишича, бунга Хитойнинг шарти, яъни Россияни ҳам тадбирга таклиф қилиш, бажарилмагани сабаб бўлган.
Европа, Осиё, Жанубий ва Шимолий Америкадаги давлатларнинг 160 нафар юқори мансабдорлари иштироки кутилаётган тадбирга Россия таклиф қилинмаган. Бундан аввалги тўртта йиғин ҳам Россия иштирокисиз ўтказилганди. Анжуманда Украинани дастаклаётган Ғарб давлатлари ҳам, Россия босқини юзасидан бетараф позицияда бўлган давлатлар вакиллари қатнашиши кутилмоқда.
Аввалроқ Bloomberg нашри хабар беришича, АҚШ президенти Жо Байден ҳам саммитда иштирок этмаслиги мумкин.
Украина президенти Владимир Зеленский Байден ва Си Цзинпинни “тинчлик саммитида” қатнашишга чақирди.
"Илтимос, зарбалар ўртасида танаффус эмас, айнан тинчлик ўрнатишда етакчилигингизни кўрсатинг", деди у. Financial Times газетасининг хабар беришича, Зеленскийнинг маъмурияти Байден ва Сига “жамоатчилик босимини ошириш” мақсадида маҳаллий ОАВ ва расмийларга кўрсатмалар туширган.
Ўтган йили Украина президенти Владимир Зеленский урушни тўхтатиш бўйича “тинчлик формуласи”ни таклиф қилган эди. Ўн банддан иборат мазкур ҳужжатда, жумладан, Россия кучларини Украина ҳудудидан олиб чиқиш, Украина ҳудудий яҳлитлигини тиклаш тинчлик сари ташланадиган асосий қадамлар экани айтилади.
Анжуманда Украинани дастаклаётган Ғарб давлатлари ҳам, Россия босқини юзасидан бетараф позицияда бўлган давлатлар вакиллари ҳам қатнашиши кутилмоқда.