АҚШ Конгрессининг 2021 йил 6 январда Капитолийга бостириб кириш билан боғлиқ вазиятни тергов қилувчи махсус қўмитаси собиқ президент Доналд Трампга нисбатан жиноий иш қўзғатишни тавсия қилмоқчи.
Қўмита кейинги ҳафта якуний ҳисоботни эълон қилади ва АҚШ ОАВ манбаларига кўра, Трампга қарши учта модда бўйича айбловлар қўйишни таклиф қилади - исён, давлат идораларига тўсқинлик қилиш ва АҚШ ҳукуматини чалғитишга қаратилган фитна.
АҚШ тарихида собиқ президентларнинг ҳеч бирига жиноят бўйича айблов эълон қилинмаган.
2021 йил 6 январ куни Вашингтон марказида ўша пайтдаги президент Доналд Трамп тарафдорлари тартибсизликлар уюштиришди. Капитолий биноси яқинида норозилик намойиши сифатида бошланган воқеа қуролли тўқнашув ва бинонинг эгаллаб олинишига айланди. Президент сайлови натижаларини бекор қилишни ва ғалабани Трампга беришни талаб қилган намойишчилар Капитолий қўриқлаш хизматини ёриб ўтиб, бинога бостириб киришди. Тўполон пайтида беш киши ҳалок бўлди.
Трампнинг Капитолийга бостириб киришдаги ролини аллақачон текшираётган АҚШ Адлия вазирлиги Конгресс қўмитаси тавсияларига амал қилишга мажбур эмас.
Трамп 6 январ воқеаларига алоқадорлигини рад этади. Жума куни унинг матбуот котиби Стивен Ченг комиссия ҳаракатларини қоралаб, унинг аъзоларини «мамлакат тарихидаги доғ» деб атади.
Махсус қўмита душанба куни якуний йиғилиш ўтказиши керак, унда барча тавсиялар эълон қилинади. Тўлиқ ҳужжат чоршанба куни эълон қилинади, деди қўмита раиси Бенни Томпсон.
Қўмитанинг фикрига кўра, Трамп сайловда мағлуб бўлгач, ҳокимиятда қолишига умид қилиб, тарафдорларини Капитолийга бостириб киришга ундаган.
Адлия вазирлиги аллақачон 6 январ воқеалари юзасидан жиноий иш терговини олиб бормоқда.
Тартибсизликлардан бир ҳафта ўтиб, Вакиллар палатаси Трампга иккинчи марта импичмент эълон қилди ва уни фитнада айбдор деб топди. Бироқ Сенат бу айбловни қўллаб-қувватламади.