19 февраль куни БМТнинг Аёлларга нисбатан дискриминацияга барҳам бериш қўмитаси Туркманистон ҳукуматига гендер зўравонликни криминаллаштиришни тавсия қилди.
Бу ва туркман хотин-қизларининг ижтимоий-сиёсий мақомига оид қатор бошқа тавсиялар Қўмитанинг 19 февраль куни эълон қилинган ҳисоботидан жой олган.
Қўмита экспертларининг таъкидлашича, Туркманистонда гендер зўравонликка оид қонунчилик ҳамда комплекс профилактика стратегияси мавжуд эмас. Қўмита туркман ҳукуматини кечиктирмасдан аёлларга нисбатан зўравонликнинг барча шаклларини, жумладан, оиладаги зўравонликни аниқ таснифлашга ва бу учун жиноий жавобгарлик белгилашга чақирди.
Шунингдек, экспертлар Туркманистонга гендер асосидаги зўравонликнинг барча шаклларига барҳам бериш стратегиясини ишлаб чиқиш ва жабрланганларга бепул юридик ва тиббий ёрдам кўрсатишни таъминлашни тавсия қилди.
Экспертлар таъкидлашича,туркман хотин-қизларидан кийим ва ташқи кўриниш жиҳатидан гендер стереотипларига мос бўлиши талаб қилинмоқда. Улар, шунингдек, аёлларнинг ёлғиз саёҳат қилиш ва машина ҳайдаш ҳуқуқлари чекланишидан хавотир билдирдилар ва расмийларни ушбу чекловларни бекор қилишга чақирдилар.
Аёллар парламентнинг қуйи палатасида атиги 24,8 фоизни ва юқори палатасида 27 фоизни ташкил этиши қайд этилган. Туркманистон Вазирлар Маҳкамасида фақат битта раҳбар аёл бор. Хотин-қизлар сиёсий партияларда, маҳаллий депутатлик Кенгашларида етарлича акс этилмаган, дейилади қўмита хулосаларида.
Қўмита сиёсий партияларнинг рўйхатларида аёл номзодлар учун квота белгилашни тавсия этган.
Қўмита томонидан ўтган йилларда ҳам Туркманистонга ҳудди шу тавсиялар берилган эди.
БМТ Туркманистонга гендер зўравонликни криминаллаштиришни тавсия қилди
Бу ва туркман хотин-қизларининг ижтимоий-сиёсий мақомига оид қатор бошқа тавсиялар Қўмитанинг 19 февраль куни эълон қилинган ҳисоботидан жой олган.