АҚШ Сенати 2023-молия йили учун (1 октябрдан 30 сентябргача) 1,7 триллион доллар (1,6 триллион евро) маблағ ажратиш лойиҳасини қабул қилди. Бу ҳақда 22 декабрь, пайшанба куни Сенатнинг Бюджет маблағлари бўйича қўмитасида маълум қилинди. Шундан 44,9 миллиард доллар (42,4 миллиард евро) Украина ва АҚШнинг НАТО бўйича иттифоқчиларига фавқулодда ёрдам кўрсатишга йўналтирилади.
Шу билан бирга, 772,5 миллиард доллар (728,8 миллиард евро) мудофаага оид бўлмаган ихтиёрий (фискал сиёсат доирасида мажбурий бўлмаган) дастурлар учун ажратилган. Яна 858 миллиард доллар (809 миллиард евро) мудофаани молиялаштириш учун мўлжалланяпти.
Қонун лойиҳасини 68 депутат қўллаб-қувватлади, 29 нафари қарши овоз берди. Ҳужжат ҳали АҚШ Конгресси Вакиллар палатасида тасдиқланиши керак, шундан сўнг у якуний имзолаш учун АҚШ президенти Жо Байденга тақдим этилади.
«Бу биз жуда узоқ вақт давомида қабул қилган энг муҳим маблағлардан бири», деди Чак Шумер, Сенатдаги Демократик партия раҳбари.
Қонун чиқарувчилар 23 декабрь куни ярим тунда (Тошкент вақти билан 10.00) бюджет маблағлари етишмаслиги сабабли федерал ҳукумат қисман ёпилишидан олдин овоз беришга ҳаракат қилишди, дея аниқлик киритди AP.
Бундан ташқари, кўплаб қонун чиқарувчилар бу ҳужжатни Вакиллар палатасида кўпчиликни ташкил этувчи Республикачилар партияси келаси йили қабул қилишни қийинлаштирмасдан олдин АҚШ Конгресси орқали олишни истамоқда.
Украина етакчиси Володимир Зеленскийнинг АҚШга ташрифидан олдин Вашингтон Украинага 1,85 миллиард доллар (1,74 миллиард евро) миқдоридаги янги ҳарбий ёрдам пакетини эълон қилди. Шунингдек, Киевга Американинг қуруқликдаги мобил зенит-ракета комплексининг ўрта масофага мўлжалланган ҳаво ва ракетага қарши мудофаа тизими батареяси тақдим этилгани тасдиқланди. Украина ҳарбийлари у билан ишлашга ўргатилади.
АҚШ президенти Жо Байден Қўшма Штатлар нега Киевга бошқа қатор қуролларни бермаётганини тушунтирди. «Бутун бир иттифоқ (НАТО) мавжуд ва у Украина билан қолиши жуда муҳим. Агар биз Украинага у ерга узатилаётган қуроллардан тубдан фарқ қиладиган қуролларни берсак, келажакда бу НАТО, Европа Иттифоқи ва бутун дунёда бўлинишига олиб келиши мумкин», деб тушунтирди Оқ уй раҳбари.
Яна бир сабаб, Европа давлатлари раҳбарларининг кескинлик янада кучайиши ва учинчи жаҳон уруши бошланишидан ташвишланиши билан боғлиқ. «Урушнинг тугашига Украинанинг жанг майдонида ғалаба қозонишини таъминлаш орқали эришиш мумкин. Биз Украинага жанг майдонида муваффақият қозониши учун зарур бўлган нарсани берамиз», - дея таъкидлади Байден.