Россия назорати остида бўлган Запорожье атом электр станциясида йирик ёнғин содир бўлган. Ҳодиса видеоси Украина президенти Владимир Зеленский томонидан ижтимоий тармоққа қўйилган. У ёнғинда Россия армиясини айблаган. Ўз навбатида, Москва ёнғин учун масъулиятни Украина тарафига юклаган. Ҳар икки томон АЭС ҳудудида радиация фони меъёрда эканини қайд этишган.
Запорожье вилоятининг Россия томонидан эгаллаб олинган ҳудуди масъули Евгений Балицкийга кўра, электр станцияси совитиш тизими объектига ўт кетган. Мулозимнинг айтишича, ёнғин чиқишига АЭС жойлашган Энергодар шаҳрининг украиналик ҳарбийлар томонидан ўққа тутилгани сабаб бўлган.
“Воқеа жойида ўт ўчирувчилар фаолият олиб бормоқда, жиддий фалокат хавфи йўқ”, деган Евгений Балицкий.
1981 йили қурилган Запорожье атом электр станцияси Европадаги энг йирик АЭС бўлиб ҳисобланади. Унинг қуввати 6000 МВт’ни ташкил қилади. Ҳозирда АЭС электр энергияси ишлаб чиқараётгани йўқ, электр станциясига қилинган қатор ҳужумлар ортидан унинг реакторлари ўчириб қўйилган.
Россия Ташқа ишлар вазирлиги масъули Мария Захарова Халқаро атом энергияси агентлигидан вазиятга муносабат билдиришни талаб қилган.
Украина президенти Владимир Зеленский эса ўз телеграм-канали орқали: “Никополдан туриб россиялик ишғолчилар Запорожье атом электр станцияси ҳудудида ёнғин чиқарганини қайд этмоқдамиз… Дунёнинг муносабатини, Халқаро атом энергияси агентлиги муносабатини кутяпмиз. Россия бунинг учун жавоб бериши керак. Запорожье станцияси устидан Украина назоратигина нормаллик ва тўлиқ хавфсизлик қайтишини кафолатлаши мумкин”, деб ёзган.
Ёнғин ортидан ҳар икки томон бир-бирларини ядровий шантажда айблаб чиқишган.