Бу ҳақда Times газетаси хабар берди.
Бу маълумот Буюк Британияда Россиянинг Украинага урушидан кейин жорий этилган янги қоидалар кучга киргач маълум бўлди. Қоидаларга кўра эндиликда Буюк Британиядаги ҳашаматли уйларга офшор компаниялар орқали эгалик қилувчилар ҳақидаги маълумотларни ошкор қилиш мумкин. Илгари бу маълумотлар ёпиқ ҳисобланган.
Times нашри реестр маълумотларини ер кадастри маълумотлари билан солиштириш орқали коррупцияга ботган мамлакатларни бошқараётган автократларнинг фарзандлари ва гумашталари юзлаб миллион фунт стерлингга мол-мулк сотиб олганлигини аниқлаган.
Давлат реестрига кўра, Назарбоевнинг тўнғич қизи Дарига Лондон шимолида 9,3 миллион фунт стерлинглик қаср ва Челсида 31 миллион фунтлик иккита квартирага эгалик қилмоқда. Уйлар Панамадаги Tropicana Assets Foundation ва Villa Magna Foundation офшор компаниялари номида.
Назарбоевнинг куёви, ўртанча қизи Динаранинг эри Тимур Кулибаев 2007 йилда офшор компанияси орқали Беркширдаги Суннингҳилл боғидаги уйни ҳозирги қиролнинг укаси шаҳзода Эндрюдан сотиб олган. У сўралган нархдан уч миллион кўпроқ, жами 15 миллион фунт тўлаган. Times газетасининг ёзишича, Кулибаев Виржиния оролларида рўйхатдан ўтган компания орқали Хайд-парк яқинида жойлашган 1,5 миллион фунт стерлинглик уйга ҳам эгалик қилади.
Тимур Кулибаев Нурсултон Назарбоевнинг ўртанча қизининг турмуш ўртоғи, Қозоғистонда таниқли миллиардер. Озодлик радиоси маълум қилишича, унинг компаниялари Олмаота шаҳрининг нуфузли туманларида аввал давлатга қарашли бўлган бир неча ер участкаларини ўзлаштирган. Улар орасида президент аввалги қароргоҳи ортидаги ер ҳам бор:
Кулибаевнинг вакили бўлган Schillings компанияси, "Куллибаев 35 йил тадбиркорлик билан шуғулланган ва ўз бойлигини қонуний ва шаффоф тарзда тўплаган муваффақиятли бизнесмен" эканлигини таъкидлаган.
2020 йилда Озодлик радиоси Қозоғистон собиқ президентининг оиласига Испания, Франция, Швейцария, АҚШ, Чехия ва Буюк Британияда умумий қиймати камида 785 миллион доллар бўлган мол-мулк тегишли эканини ёзган. Журналистлар Нурсултон Назарбоевнинг яқинлари – унинг акаси Болат Назарбоев, Болатнинг рафиқаси Майра Курмангалиева, куёви Тимур Кулибаев, набирасининг рафиқаси Зелина Катранованинг онаси ва набирасининг собиқ рафиқасининг отаси бўлмиш Кайрат Боранбаевлар олтита давлатда 16 та ҳашаматли мол-мулкка эгалик қилаётганини аниқлаган.
Қозоғистонда 2022 йил январида бўлиб ўтган оммавий намойишлардан сўнг Назарбоев оиласининг аъзолари ва унинг атрофидаги одамлар ўз лавозимларидан айрилди: хусусан, Тимур Кулибаев «Атамекен» тадбиркорлар палатаси раиси лавозимидан истеъфога чиқди. Динара Кулибаева камдан-кам кўриниш бермоқда. ОАВ хабарларига кўра, у асосан вақтини чет элда ўтказади.
Динара Кулибаева Женева кўли бўйида жойлашган иккита ҳашаматли мулк, жумладан Бельрив қасрининг эгасидир. Швейцария ОАВ Кулибаеванинг тарихий аҳамиятга эга бўлган қасрни қайта таъмирлаш режаси Женева кантони маъмуриятини хавотирга солгани ҳақида ёзган.
Deutsche Welle шу йилнинг февраль ойида Динара Кулибаева, унинг турмуш ўртоғи Тимур Кулибаев ва унга алоқадор компаниялар Германияда умумий қиймати 100 миллион евролик сарой, вилла ва иккита меҳмонхонага эгалик қилаётгани ҳақида хабар берган эди. Баден-Вюртемберг депутати Йонас Вебер ҳукуматдан ушбу сарой ва виллаларни мусодара қилишни сўраган.
Озодлик радиосининг қозоқ хизмати хабарига кўра, Кулибаевнинг Европа мамлакатларида бошқа мулклари ҳам бор.
Германияда депутат Назарбоев қариндошларининг мулкини мусодара қилишга чақирмоқда: