АҚШ президенти Жо Байден президентликка номзод Доналд Трампга қилинган ҳужум борасида қатор янги баёнотлар берди.
Байденнинг сўзларига кўра, президент маъмурияти хавфсизлик органларидан воқеа юзасидан ҳисобот олган. Ҳозирда ФҚБ тергов олиб бормоқда, у дастлабки босқичда. "Мотивлар ҳақида батафсил маълумот йўқ, аммо мерган кимлиги маълум."
"Шунинг учун мен олдиндан хулоса чиқармасликка чақираман, ФҚБ ўз ишини қилсин," - деди Байден.
Тергов давом этар экан, АҚШ президенти қатор кўрсатмалар берди:
- Трамп собиқ президент ва номзод сифатида кучайтирилган қўриқлаш хизматига эга бўлади. Байден АҚШ Махфий хизматига республикачига хавфсизликни таъминлаш учун барча зарур ресурсларни тақдим этишни топширди;
- АҚШ президенти Махфий хизматга Республикачилар партиясининг 15 июль куни бошланадиган қурултойида барча хавфсизлик чораларини қайта кўриб чиқишни топширди;
- АҚШ Миллий хавфсизлик вазирлигига содир бўлган воқеани мустақил кўриб чиқиш топширилди.
Байден, шунингдек, Трамп ҳужумдан сўнг "тикланаётганини" айтди. Бундан ташқари, у Трампнинг сайловолди митингида ҳалок бўлган эркакнинг оиласига ҳамдардлик билдирди.
Брифингдаги нутқида АҚШ президенти яна бир бор мамлакатни "бирдамликка" чақирди.
13 июль куни Пенсилваниядаги сайловолди кампанияси вақтида собиқ президент Доналд Трампга суиқасд уюштирилди. АҚШ расмийлари гумондор 20 ёшли йигит Томас Метю Крукс бўлганини маълум қилди. Крукс махфий хизмат ходимлари томонидан дарҳол отиб ўлдирилган. Шунингдек, ҳодисада бир томошабин ҳалок бўлган, яна икки киши оғир яраланган.
Ҳодиса Республикачилар партиясининг Миллий қурултойи очилишидан икки кун олдин содир бўлган, унда Трамп навбатдаги сайловга партиядан президентликка номзод этиб тайинланиши кутилмоқда.