Департаментнинг йиллик ҳисоботида "президент Эмомали Раҳмон ва унинг оиласининг иқтисодиёт ва сиёсатдаги чексиз ваколати, қийноқлар, суд мустақиллиги билан боғлиқ жиддий муаммолар, трансмиллий репрессия, сўз ва Интернет эркинлигини жиддий чеклаш, журналистларга нисбатан зўравонлик ҳолатлари" қайд этилган.
Тожикистон ҳукумати мамлакатда сиёсий маҳбуслар мавжудлигини инкор этади. Бироқ ҳисоботда айтилишича, ННТлар ҳисоб-китобларига кўра, Тожикистонда 400 га яқин сиёсий маҳбус бор.
Уларнинг аксарияти 2022 йилда Тоғли Бадахшон автоном вилоятида бўлиб ўтган намойишларда ҳибсга олинган фаоллар ва иштирокчилардир.
Тожикистон расмийлари 2022 йилда баҳорида ТБАВда уюшган жиноий гуруҳлар аъзоларини қўлга олиш амалиёти ўтказилганини таъкидлайди. Бироқ бадахшонликлар бу "амалиётни" тинч аҳолига қарши репрессия деб ҳисоблайди.
Ҳисоботда ҳукумат чет элдаги фуқароларга нисбатан репрессив методлар, жумладан, уларнинг шахсини тасдиқловчи ҳужжатларини бекор қилиш орқали уларнинг ҳуқуқий мақомига путур етказиш, ҳаракатини чеклаш ёки улар жойлашган мамлакатда ҳибсга олинишини қўзғатишга урингани ҳақида хабарлар кузатилгани келтирилган.
Ҳукумат маълумотларига кўра, биргина 2023 йилнинг биринчи ярмида "экстремизм" ва "терроризм"да айбланиб, хориждан 36 киши қайтарилган: Россиядан 18 нафар, Туркиядан 15 нафар, Германия, Ўзбекистон ва Полшадан бир нафардан. Уларнинг барчаси узоқ муддатга қамалган.
Хусусан, Давлат департаменти ҳисоботида Германия Тожикистон Ислом уйғониш партиясининг етакчиларидан бири Шамсиддин Саидовнинг ўғли Абдулло Шамсиддинни мамлакатдан депортация қилгани тилга олинган. Тожикистонда у "конституциявий тузумни зўравонлик билан ўзгартиришга чақириқлар"да айбланди ва етти йилга қамалди.
Айни йили Шамсиддин Саидовнинг жияни Саидумар Саидов ҳам “тақиқланган ташкилотга аъзолик”да айбланиб олти йилга қамалган эди. Экспертлар иккала ҳолатни ҳам "сиёсат" билан боғламоқда.