Журналистларнинг сўзларига кўра, Ражапаксага турмуш ўртоғи ва икки тансоқчиси ҳамроҳлик қилган. Қайд этилишича, амалдаги қонунчиликка кўра, миграция хизмати ходимлари давлат раҳбарини мамлакатдан чиқиб кетишига тўсқинлик қилиш ҳуқуқига эга эмас.
Малдив ороллари архипелаги Ҳинд океанида, Шри-Ланкадан 700 км ғарбда жойлашган. Маълум қилинишича, Шри-Ланка президенти Малдив ороллари пойтахти Мале шаҳрига учиб кетган. Шу билан бирга, ҳукумат доираларидаги манбалар у ердан у Осиё минтақасидаги бошқа давлатлардан бирига бориши эҳтимоли борлигини айтишмоқда.
Шри-Ланкада давом этаётган норозилик намойишлари фонида 9 июль куни Ражапакса «ҳокимиятнинг тинч йўл билан ўтказилишини таъминлаш» учун 13 июль куни президентликдан воз кечишини эълон қилди. Аввалроқ Шри-Ланка бош вазири Ранил Викрамасинге партия етакчилари илтимосига кўра ўз лавозимини тарк этишга тайёрлигини айтган эди. Бунгача мамлакат сиёсий партиялари етакчилари фавқулодда йиғилишда президент ва бош вазир истеъфосини талаб қилди.
Шри-Ланкадаги оммавий тартибсизликлар май ойида сўнгги 70 йилдаги энг ёмон иқтисодий инқироз фонида бошланган. 9 июль куни намойишчилар мамлакатнинг энг йирик шаҳри Коломбодаги президент қароргоҳига бостириб киришга ҳаракат қилишди.