Венгрия президенти Каталин Новак истеъфога чиққанини эълон қилди. Бунга сабаб болаларга нисбатан жинсий зўравонликни яширганликда айбланган шахснинг авф этилиши билан боғлиқ можаро бўлди.
У билан бирга авф қарорига қўл қўйишни тавсия этган адлия вазири Юдит Варга ҳам исеъфога берди.
Новак, 2023 йил баҳорида Рим папаси ташрифи арафасида, католик черковига оид болалар уйининг собиқ директор ўринбосарини афв этган. Директор педофилия айбланиб узоқ муддатга қамалган. Ўринбосар эса ўз ўқувчиларига нисбатан жинсий зўравонлик ҳолатларини яширгани учун 3 йилга қамалган эди.
Тасодифан ошкор бўлиб қолган бу авф мамлакатни жунбушга келтирди. Ўз телемурожаатида Новак «хато қилганини» айтди. Энди Венгрия парламенти 30 кун ичида янги давлат раҳбарини сайлаши керак.
Венгрия парламентар республика бўлгани учун президент ваколатлари қонун билан анча чекланган. Бироқ бу можаро Бош вазир Виктор Орбаннинг ҳукмрон "Фидес" партиясининг обрўсига салбий таъсир қилиши мумкин, чунки президент Каталин Новак ҳам, адлия вазири Юдит Варга ҳам ўз лавозимини эгаллашдан аввал айнан шу партиянинг етакчиларидан бўлганлар.
Каталин Новак 2022 йил март ойида президентликка сайланган эди.