Ссылки доступа

Путин Қрим кўпригидаги портлашда Украина хавфсизлик хизматларини айблади


Россия президенти Владимир Путин Украина махсус хизматларини Қрим (Керч) кўпригида 8 октябрь куни содир бўлган портлашни уюштирганликда айблади.

Россия телеканаллари якшанба оқшомида Путиннинг Тергов қўмитаси раҳбари Александр Бастрикин билан учрашуви тасвирини намойиш этди. Унинг таъкидлашича, портлашда нафақат Украина махсус хизматлари, балки Россия ва хорижий давлатларнинг айрим фуқаролари ҳам иштирок этган.

Бастрикиннинг сўзларига кўра, портлаш бўйича иш «терроризм» моддаси бўйича иш қўзғатилган ва ФСБ ходимлари гўёки айбдорларни аниқлаб бўлган. Путин Қрим кўпригининг бузилишини “муҳим инфратузилмани йўқ қилишга қаратилган теракт” деб атади.

“Муаллифлар, ижрочилар, мижозлар Украинанинг махсус хизматларидир”, — дея қўшимча қилди Путин.

Қрим кўпригида портлаш 8 октябрь куни эрталаб содир бўлди. Россия терговига кўра, аннекция қилинган Қрим томон кўприкдан ўтиб кетаётган юк машинаси портлаб кетган. Шундан сўнг темир йўл поездининг ёнилғи баклари ёниб кетган. Уч киши ҳалок бўлгани тасдиқланди. Краснодар ўлкасидан Қримгача бўлган кўприкнинг автомобиль қисмининг икки қисми қулаб тушди.

Бастрикиннинг сўзларига кўра, юк машинаси Болгариядан Грузия ва Арманистон орқали Шимолий Осетияга, ундан кейин эса Краснодар ўлкасига кетаётган бўлган. Бундай тақдимотда маршрут ғалати кўринади - хусусан, юк машинаси Россия билан чегарадош бўлмаган Арманистондан Россиянинг Шимолий Осетия республикасига қандай етиб бориши аниқ эмас. Аввалроқ ОАВда юк машинаси эгаси краснодарлик тадбиркор экани, унинг қариндоши машинани бошқараётгани ҳақида хабар берилганди.

Кўприкда енгил автомашиналар ҳаракати унинг сақланиб қолган қисми – икки қатор бўйлаб қайта тикланди. Поездлар ҳаракати ҳам тикланди.

Украинанинг қатор расмийлари воқеани олқишлаган, расмий Киев эса портлаш учун жавобгарликни ўз зиммасига олмади. Украина президенти девони маслаҳатчиси Михайло Подоляк бу Россиядаги ҳокимият учун кураш натижаси бўлиши мумкинлигини тахмин қилди. Қўшма Штатлар портлаш ҳақида изоҳ бермади, фақат Украинадаги уруш учун Россия жавобгар эканлигини таъкидлади. Американинг етакчи ОАВлари Украина раҳбариятидаги манбаларга таяниб, портлаш Украина махсус хизматларининг операцияси натижаси бўлиши мумкинлигини тахмин қилмоқда.

Хабар қилинишича, душанба куни Путин Хавфсизлик кенгаши аъзолари билан учрашув ўтказади.

XS
SM
MD
LG