Унинг сўзларига кўра, “зирҳли техникадан фойдаланиш билан иш тугамайди”. Бу ҳақда у Сталинград жангидаги ғалабанинг 80 йиллигига бағишланган кечадаги нутқида айтиб ўтди.
Путиннинг таъкидлашича, Россия яна “коллектив Ғарбнинг агрессиясини қайтаришга” мажбур. Шунингдек, у мамлакат хавфсизлигига таҳдид соладиган нацизм мафкураси ҳақида гапирди. Унинг сўзларига кўра, Россия билан замонавий уруш бошқача бўлади.
"Ақл бовар қилмайдиган, аммо ҳақиқат: бизни яна бортида хочлар бор немис Леопард танклари билан таҳдид қилишмоқда. Ва улар яна Бандера қўли билан Украина тупроғида Россия билан жанг қилишмоқчи", - деди Путин.
Аввалроқ Россиянинг юқори мартабали амалдорлари ва Путин Украинага бостириб кирганларида мамлакатни «денацификация» қилишни ўз олдига мақсад қилиб қўйганликларини айтишганди: бу атама айнан нимани назарда тутгани тушунтирилмаган. Украинага ёрдам бераётган Ғарб давлатлари Кремль чизмоқчи бўлган Иккинчи жаҳон уруши билан ўхшашликларни рад этиб, ҳозирда Россия босқинчи сифатида ҳаракат қилаётганига ишора қилмоқда.
Январь ойида Қўшма Штатлар 31 та Абрамс танкини етказиб беришга тайёрлигини, Германия эса ўзининг 14 та Леопард танкини топширишини, шунингдек, бошқа мамлакатларга Леопардларни Украинага етказиб беришга рухсат беришини эълон қилди. Шундай қилиб, Киев камида 112 немис танкларини қабул қилиши мумкин. Улар Украинада икки-уч ой ичида пайдо бўлиши кутилмоқда. Киев ва Берлин жаҳон ҳамжамияти томонидан расман тан олинган чегаралари доирасида Россия ҳудудида танклар ишлатилмаслигини эълон қилди. Ускуналар фақат Украина ҳудудини озод қилиш учун ишлатилади.
Россиянинг Германиядаги элчиси Сергей Нечаев Берлиннинг танклар бўйича қарорини “ўта хавфли” деб атади. “Қарор можарони янги қарама-қаршилик даражасига олиб чиқади ва немис сиёсатчиларининг ГФРнинг унга аралашишни истамаслиги ҳақидаги баёнотларига зиддир”, — деди Нечаев.
Кремль Киевга Америка танклари етказиб берилишини изоҳлар экан, улар украиналик ҳарбийларга унчалик ёрдам бермаслигини айтди. "Ишончим комилки, кўплаб экспертлар бу ғоянинг бемаънилигини тушунишади. Технологик жиҳатларга келсак, бу жуда муваффақиятсиз режа", - деди Россия президенти матбуот котиби Дмитрий Песков.