Россия телеканаллари "Крокус"даги терактда айбланаётганлар иқрорини намойиш этди

Якшанба куни Россия телеканаллари “Крокус Сити холл”га ҳужумида асосий тўрт айбланувчининг сўроқ қилинаётганини эфирга узатди.

“Биринчи канал” ва "Россия-1" телеканалларида прайм-таймда намойиш этилган видеолавҳа ФСБ томонидан тақдим этилган.

Видеода гумонланувчилар барча ҳаракатларни Сайфулло деган одам мувофиқлаштириб, терактдан сўнг "Киев томон қочишни" айтганини даъво қилмоқда.

Икки гумонланувчи, Муҳаммадсобир Файзов ва Саидакрами Рачалибзода, Киевда уларга миллион рублдан ваъда қилинганини айтган. Файзовнинг сўзларига кўра, чегарада уларни “Киевгача етиб боришда кўмаклашувчи йигитлар” кутаётган бўлган. Фаридуни Шамсиддин ва Далержон Мирзоевлар "Сайфулло" уларга машинани чегарада ташлаб, кейинги йўналиш учун унга қўнғироқ қилишни буюрган.

"Первый канал"даги кўрсатув ижодкорларининг иддаосига кўра, ҳужумчилар Украинага ўтиши учун чегарада миналардан тозаланган иккита йўлак тайёрлаб қўйилган. Аввалроқ Россия президенти Владимир Путин ҳам чегарадаги "туйнуклар" ҳақида гапирган эди.

Кўрсатувларда, шунингдек, гумонланувчиларнинг телефонларидан топилган Украина байроғининг фотосуратлари ҳам кўрсатилган. Бироқ, ушбу фотосуратлар, Озодлик радиоси аниқлашича, Depositphotos фотобанкидаги "Украина армияси" мавзусига оид фотосуратлардир.

Путин ва пропагандачи ОАВлар “терактда радикал исломчилар эмас, Украина айбдор” деган фикрни зўр бериб россияликлар миясига сингдирмоқда. Ҳолбуки, Украинага қарши биронта далил кўрсатилгани йўқ.

“Крокус”га ҳужум муносабати билан илк кунидаёқ ҳибсга олинган ушбу тўрт гумонланувчига умрбод қамоқ жазоси хавф солмоқда. Маҳбуслар суд залига мўматалоқ ва ярадор аҳволда олиб келинган.

Далержон Мирзоевнинг бўйнида бошига елимхалта кийдириб, бўғилганидан қолган излар бор эди.

Саидакрам Муродали Рачабализодани қўлга олиш чоғида унинг қулоғини кесиб олишган. Суддан олинган кадрларда унинг боши боғлаб қўйилгани кўринади. Аввалроқ, уни ўрмонда қўлга олиш видеосини Grey Zone телеграм-канали эълон қилганди. Видеода қўллари боғлиқ бир эркакни қуршаб турган кучишлатар ходимлар акс этган. Ушланган одамнинг боши қонга беланган, ўнг қулоғининг бир парчаси йўқ. Полициячилардан бири кесиб олинган қулоқ парчасини унинг оғзига тиқишга уринмоқда. Видео изоҳида “ҳар бирингизни шу ҳолга соламиз” деган сўзлар бор.

Учинчи гумонланувчи – Муҳаммадсобир Файзовни суд мажлисига ётқизма аравачада, яланғоч баданига тиббиёт халати кийдирилган ҳолда келтиришди. Суддан олдин у реанимацияда бўлган, ўша ерда сўроқ қилинган. Қўлга олиш чоғида у қуролли қаршилик кўрсатгани иддао қилинмоқда.

Тўртинчи гумонланувчи – Шамсиддин Фаридуний қўлга олиниб, сўроқ қилинганида у қўллари қайириб боғланган ҳолда чўккалаб турган эди. Кейинроқ унинг муҳтамалан ток билан қийноққа солингани акс этган фотосурат тарқалди. Судда Шамсиддин юзлари шишган ва кўкарган ҳолда ўтирди.