Ҳужжат амалдаги давлат раҳбари Қасим-Жўмарт Тўқаевга имзолаш учун юборилган.
Қонунга ўзгартириш киритилди, унга кўра Биринчи Президент куни давлат байрамлари қаторидан чиқариб ташланади ва Давлат рамзлари куни, Шукроналик куни ва бошқаларга ўхшатиб “ижтимоий аҳамиятга эга” тоифасига киритилади.
25 октябрда нишонланадиган янги байрам санаси - Республика куни ҳам қонун билан белгиланди. Мустақиллик куни (16 декабрь) байрамлар қаторига киритилган.
"Бу тарихий ва жуда муҳим қарор. Мамлакатимиз мустақиллиги ҳақиқатан ҳам шу санадан бошланади. Шу боис бу куннинг умумхалқ байрами сифатида белгиланиши давлатчилик ва суверенитет нуқтаи назаридан муҳим қадамдир. Умид қиламизки, келажакда бу байрами мустақилликни оммалаштириш ва мустаҳкамлашга хизмат қилади”, - деди Сенат спикери Маулен Ашимбаев.
2012 йилдан бери Қозоғистонда Биринчи Президент куни 1 декабрда нишонланади. Қозоғистоннинг биринчи президенти Нурсултон Назарбоев бўлиб, у мамлакатни 1991 йилдан бери бошқариб келган. 2019 йилнинг 20 мартида Назарбоев президентлик лавозимини тарк этди.
Қозоғистонда Республика куни аввалроқ 25 октябрда нишонланар эди. 2009 йилда Республика куни байрамлар рўйхатидан чиқарилди.
Айни дамда Қозоғистонда 16-17 декабрь кунлари нишонланадиган Мустақиллик куни миллий байрамдир.
16 сентябрь куни Қозоғистон парламенти мамлакат Конституциясига ўзгартиришларни бирданига икки ўқишда қабул қилди. Депутатлар Остона номини пойтахтга қайтариш, шунингдек, президентлик ваколатини бир марталик етти йиллик муддат билан чеклашни қўллаб-қувватладилар. Тузатишлар аввалроқ ушбу ўзгаришларни маъқуллаган президентга имзолаш учун юборилди.
Сентябрь ойи бошида Тўқаев муддатидан олдин президентлик сайловларини 2022 йилнинг кузида ўтказишни таклиф қилган эди. Навбатдаги президентлик сайловлари 2024 йилда бўлиб ўтиши керак эди. Шундан сўнг Тўқаев ўз ваколат муддатини қисқартиришга ва навбатдан ташқари президентлик сайловларига боришга тайёрлигини маълум қилди.
Шунингдек, сентябрь ойи бошида Тўқаевга содиқ парламентарийларни бирлаштирган Жана Қозоғистон гуруҳи депутатлари Остона номини пойтахтга қайтаришни таклиф қилган эди.