АҚШнинг собиқ президентига оид жиноят ишини кўриб чиқаётган судья Доналд Трампга 9000 доллар жарима солди.
Шунингдек, судья Хуан Мерчан Трамп иш тафсилотлари ҳақида сукут сақлаш талабини бузишда давом этса, у қамоққа олиниши мумкинлиги ҳақида огоҳлантирди.
Судья Трампнинг ижтимоий тармоқларда қилган тўққизта баёнотининг ҳар бирига минг доллардан жарима белгилаган. Судьянинг таъкидлашича, Трамп судда иштирок этаётган гувоҳлар ва бошқа иштирокчиларни танқид қилмаслиги учун унга иш бўйича сукут сақлаш талаби қўйилган эди.
Мерчаннинг айтишича, жарима профилактик восита сифатида етарли бўлмаслиги мумкин. Шу билан бирга, судья унинг тасарруфида қаттиқроқ жазо тайинлаш ваколати йўқлигидан шикоят қилди.
Трамп устидан суд жараёни 15 апрелда бошланди. Бу Қўшма Штатлар тарихида собиқ президент устидан ўтказилажак илк маҳкамадир.
Трампнинг ўзи АҚШдаги президентлик сайловолди пойгаси манзарасида суд праймеризга таъсир қилиши мумкинлиги, бу эса сайлов жараёнига аралашиш бўлиб ҳисобланишини қайд этган. Журналистлар билан суҳбатда Трамп яна бир бор ҳеч қандай жиноят содир этмаганини билдирган.
Тергов маълумотларига кўра, Трамп 2016 йилдаги сайлов олдидан порноактриса Сторми Дэниэлсга адвокати орқали 130 минг доллар тўлаб, ўзи билан жинсий алоқа қилгани ҳақида сукут сақлашни сўраган.
Тўлов ноқонуний бўлмаган, бироқ у Трампнинг адвокатига юридик хизматлар учун тўланган маблағ ўлароқ расмийлаштирилган. Нью-Йорк штатида бу ҳисоботни сохталаштириш ҳисобланади.
Трампнинг адвокати Майкл Коэн 2018 йилда ҳужжатларни сохталаштиришга оид иш бўйича уч йилга қамалган. Ўша пайтда президентлик курсисини эгаллаб турган Трампга эса айблов билдирилган эмас.
Нью-Йоркдаги маҳкама жараёни собиқ президентга нисбатан қўзғатилган тўртта жиноят ишининг биринчиси бўлади.
Судья Трампнинг ижтимоий тармоқларда қилган тўққизта баёнотининг ҳар бирига минг доллардан жарима белгилаган. Судьянинг таъкидлашича, Трамп судда иштирок этаётган гувоҳлар ва бошқа иштирокчиларни танқид қилмаслиги учун унга иш бўйича сукут сақлаш талаби қўйилган эди.