Ссылки доступа

Парвиз Ғоибназаров, дӯсти Гулбиддин Зиёбековро ба 18 сол зиндон маҳкум кардаанд


Парвиз Гоибназаров

Додгоҳи шаҳри Душанбе Парвиз Ғоибназаров, зодаи вилояти Бадахшон ва дӯсти Гулбиддин Зиёбековро ба 18 сол зиндон маҳкум кардааст.

Дар ин бора рӯзноманигор Анора Саркорова рӯзи 7-уми сентябр дар шабакаҳои иҷтимоӣ хабар дод. Як манбаи Радиои Озодӣ 8-уми сентябр иттилоъро тасдиқ кард, вале ҷузъиёт надод. Манобеи пойгоҳи хабарии "Бомдод" гуфтаанд, Парвиз Ғоибназаров "ба иштирок дар қазияи машҳури, ба гуфтаи мақомот, “боздошти худсарона” ва гуё латукӯбу таҳқири ёрдамчии додситони ноҳияи Роштқалъа Абдусаттор Абирзода айбдор мешуд."

Анора Саркорова навишт, Ғоибназаров моҳи августи имсол аз тарафи нерӯҳои қудратии Русия дар назди хонааш дар Маскав дастгир ва бе риояи қоидаи истирдоди гумонбарон ба Тоҷикистон супурда шуд. Рӯзноманигор мегӯяд, мақомот наздикони Парвиз Ғоибназаровро дар бораи истирдод ва иттиҳоми зидди ӯ хабардор накардаанд.

Ба навиштаи Саркорова, тафтишот ва мурофиаи ин зодаи Бадахшон ба таври пӯшида ва бе ҳузури вакили мудофеъ гузашт.

Парвиз Ғоибназаровро яке аз дӯстони варзишгар ва фаъоли ҷавонон Гулбиддин Зиёбеков медонанд. Зиёбеков 25-уми ноябри соли 2021 кушта шуд. Мақомот мегӯянд, ӯ дар ҷараёни амалиёти боздошт муқобилияти мусаллаҳона нишон дод, вале пайвандонаш бовар доранд, ки ӯ силоҳ надошт.

Ин қазия пас аз он сурат гирифт, ки як духтари маҳаллӣ аз озори ёвари додситон Абдусаттор Абирзода шикоят кард ва гурӯҳе аз сокинон аз ӯ хостанд, маъзарат бипурсад. Ёвари додситон дар наворе барои рафтораш узр хост. Баъдан мақомот Гулбиддин Зиёбеков ва ҳамроҳонашро ба боздошти худсарона ва таҳқири намояндаи додситонӣ айбдор карданд.

XS
SM
MD
LG