Олар санкцияларды айналып өтіп, Ресей армиясының қажеттілігі үшін қолдануы мүмкін америкалық электрониканы жеткізіп келген деп айыпталып жатыр.
Бұл жөнінде АҚШ-тың әділет министрлігі мәлімдеді.
Бруклин федералдық сотының кезекті отырысында Насриддинов пен Гольцев ресейлік "Тесткомплект", "Радиавтоматика", "ЭКВ-Нева" және "Комтек" компаниялары үшін америкалық компаниялардан құрал-жабдықтарды сатып алуда делдал болғанын мойындады.
Америкалық ресми өкілдердің айтуынша, айыпталушылар сатып алған электрондық тетіктер кейін Украинада тәркіленген ресейлік әскери техникадан табылған.
АҚШ әділет министрлігі мәлімдегендей, Насриддинов пен Гольцев 20 жылға дейін бас бостандығынан айырылуы мүмкін.
Азаттықтың тәжік қызметі хабарлағандай, Салимжон Насриддинов америкалық компаниялардан жабдықтарды және электрониканы сатып алу үшін 2021 жылы жазда Бруклинде SH Brothers Group (SH Брозерс Груп) компаниясын тіркеуден өткізген.
Насриддинов 2023 жылы қаңтарда SN Electronics компаниясын құрып, оны әйелінің атына тіркеген.
Тауарларды Гонконг, Түркия және Біріккен Араб Эмираттарында орналасқан компаниялар арқылы Ресейге жөнелтіп отырған.
Салимжон Насриддинов Бруклиндегі "Тандури" мейрамханасының қожайыны екені айтылып келеді. Ол көп жылдар бойы Ресейде жұмыс істеп, Тәжікстандағы Рогун ГЭС-нің құрылысы үшін техникалар жеткізіп отыруға көмектескен.