Япония Россия ва Шимолий Корея ўртасида қурол-яроғ алмашинувига кўмаклашганларга қарши санкция киритди. Бир Россия фуқароси ва қатор Россия ҳамда Кипр ширкатларига компаниясига қарши санкциялар киритилгани ҳақида Япония Ташқи ишлар вазирлиги сайтида хабар берилди.
Санкциялар рўйхатига, хусусан, “224-парвоз отряди” давлат авиакомпанияси бош директори Владимир Михейчик, шунингдек, авиакомпаниянинг ўзи, Астрахан вилоятидаги "Ашулуқ" ҳарбий полигони ва Владимировка илмий-тадқиқот комплекси, ҳарбий транспорт қўмондонлиги Дунай қишлоғидаги денгиз ракета мажмуаси, «Трансморфлот» ва бошқалар киритилган. Рўйхатга шунингдек, Кипрнинг IBEX Shipping ва Azia Shipping компаниялари киради. Уларнинг Япониядаги активлари ва тўловлари музлатилади.
Япония ҳукуматининг баёнотида айтилишича, мамлакат Россиянинг Шимолий Кореядан қурол сотиб олишини қоралайди, чунки бу БМТ Хавфсизлик Кенгаши резолюцияларини бузиш ҳисобланади ва Украинадаги вазиятнинг янада кескинлашишига олиб келиши мумкин.
Япония билан бир қаторда Сеул ҳам Москва ва Пхенянга қарши санкциялар жорий этганини эълон қилди. Жанубий Корея санкциялари Шимолий Кореянинг етти фуқароси ва Россиянинг икки кемасига нисбатан киритилган.
Ядро қуролини ишлаб чиққани ва синовдан ўтказгани учун Пхенянга нисбатан нафақат Ғарб, Япония ва Жанубий Корея, балки БМТ Хавфсизлик Кенгаши ҳам қатор санкцияларни, жумладан қурол савдосига тақиқни киритган. Россия БМТ аъзоси сифатида санкцияларга амал қилишга мажбур эди.
Жанубий Корея Мудофаа вазирлиги маълумотларига кўра, Россия 2022 йилдан бошлаб Шимолий Кореядан 3 миллиондан ортиқ артиллерия снарядлари ва 500 мингдан ортиқ ракета снарядларини харид қилган. Россия бу аслаҳа эвазига Шимолий Кореяни космик парвозлар технологияси билан таъминлагани айтилмоқда.
Токио ва Сеул қурол-яроғ борасида Россия ва Шимолий Кореяга кўмаклашаётганларга қарши санкция киритди
Санкциялар Россия ва КХДР фуқаролари, қатор ширкатларга қарши киритилган.