Анқара ушбу ҳудудларда қазиб олинаётган кўмирнинг энг йирик харидори бўлиб, бу ердан ташқи бозорга чиқарилган кўмирни 95 фоизини сотиб олган. Бу ҳақда Reuters ахборот агентлигининг суриштирувида айтилган.
Reuters савдо статистикасини таҳлил қилиб, Туркия бозорига босиб олинган минтақалардан кўмирни камида 10 та россиялик ширкат етказиб беришини аниқлаган. Кўмирнинг бир қисми Ростов-Дон ва Новороссийск портларидан жўнатилади. Харидорлар Гонконг, Бирлашган Араб Амирликлари ва офшор зоналарда, жумладан Британиянинг Виржиния ороллари ва Белизда рўйхатдан ўтган компаниялардир.
Журналистлар бу харидорлар билан боғлана олмадилар ёки уларнинг ортида ким турганини аниқлай олмадилар. Белиз ҳукумати уларга савдо реестридан кўмирнинг энг йирик харидори ҳақидаги маълумотларни тақдим этишдан бош тортди. Ҳужжатларга кўра, иккинчи йирик импортер жойлашган Гонконгдаги бинода компания ҳақида ҳеч қандай маълумот йўқ.
АҚШ ёки Европа Иттифоқи давлатларидан фарқли ўлароқ, Туркия босиб олинган Украина ҳудудлари билан савдони чекламаган. Аввалроқ журналистлар турк компаниялари Россия назоратидаги Херсон ва Запорож вилоятларининг ҳудудларидан кўмирни сотиб олаётганини аниқлаган эди. Украина, Туркия ва Россия мутасаддилари Reuters агентлигига кўмир билан боғлиқ суриштирув борасида изоҳ бермади.
Агентлик ёзишича, аниқланган кўмир партиясининг қиймати 14,3 миллион долларни ташкил этади. Бу Туркия Россиядан сотиб оладиган кўмирнинг тахминан бир фоизини ташкил қилади.
Туркия йилнинг биринчи ярмида Украинанинг Донецк ва Луганск вилоятларининг Москва назоратидаги ҳудудларида ишлаб чиқилган 160 минг тонна кўмир сотиб олган.