Ссылки доступа

Украина Беларусдаги ядро қуроли масаласида БМТ Хавфсизлик кенгашини чақиришни сўради


Александр Лукашенко ва Владимир Путин
Александр Лукашенко ва Владимир Путин

Владимир Путиннинг Беларусда Россия ядро қуролини жойлаштириш ҳақидаги баёноти ортидан Украина БМТ Хавфсизлик кенгаши йиғилишини чақиришни талаб қилди. Бу ҳақда Украина ташқи ишлар вазирлиги баёнотида айтилади.

Украина БМТ Хавфсизлик Кенгашининг доимий аъзолари – Франция, Буюк Британия, АҚШ ва Хитойдан кескин чоралар кутмоқда. Россия ҳам ушбу ташкилотнинг доимий аъзоси ва унда вето ҳуқуқига эга.

"Россиянинг Беларус ҳудудида ядро қуролини тарқатмаслик тўғрисидаги шартнома асосларини, қуролсизланиш архитектурасини ва умуман халқаро хавфсизлик тизимини бузган ҳолда тактик ядро қуролларини жойлаштириш нияти ҳақидаги сўнгги баёнотлари жиноятчи Путин режимининг навбатдаги провокацион қадамидир", - дейилади Украина Ташқи ишлар вазирлиги баёнотида.

Украина ТИВ Беларус жамиятига Путиннинг "жиноий ниятларига шерик" бўлмасликка чақирди.

НАТО расмийларига кўра, Путиннинг ушбу эҳтимолий қарори “хавфли ва масъулиятсизлик”дир. Алянс қилган баёнотга кўра, ҳозирча Россиянинг ядро қуролини қўллашга тайёрланаётганига ҳеч қандай аломатлар йўқ. Шу сабаб ҳам НАТО иттифоқчиларининг жанговар тайёргарлиги даражасини ўзгартириш ниятида эмас. АҚШ Давлат департаменти ва Пентагон ҳам мамлакат ядровий кучлари шай ҳолатга келтирилмаслигини маълум қилди.

Шанба куни «Россия-24» давлат телеканали президент Путин билан қилган суҳбатда Россия Беларусда ўзининг тактик ядро қуролини мамлакат президенти Александр Лукашенконинг илтимосига кўра жойлаштириш ниятида эканлигини маълум қилди. Россия президентининг сўзларига кўра, Беларусда тактик ядро қуроллари сақланадиган омбор қурилиши 1 июлгача якунланади.

XS
SM
MD
LG