Ссылки доступа

Өзбекстан президентінің үлкен қызы лауазымды қызметке тағайындалды


Саида Мирзияева 

Өзбекстан президенті Шавкат Мирзияев қызы Саида Мирзияеваны президент әкімшілігінің байланыс және ақпараттық саясат бөлімінің басшысы қызметіне тағайындады. Бұл жайында президенттің баспасөз хатшысы Шерзод Асадов хабарлады. 

Жаңадан құрылған бөлім қоғамдық пікір және ақпараттық саясатты зерттеумен айналысады. Мирзияева сонымен бірге елдегі әлеуметтік, мәдениет және білім беру саласындағы реформалардың жүруін қадағалайды.

Өзбекстан президентінің үлкен қызы Саида 2019-2022 жылдарда президент жанындағы ақпарат және бұқаралық байланыс агенттігінің директор орынбасары қызметін атқарған. 2022 жылдан бері ұлттық масс-медианы дамыту қорының төраға орынбасары болған.

2021 жылдың қараша айында Өзбекстанда мемлекеттік қызметке туыстарын жұмысқа алуға тыйым салу ұсынылған. Тиісті заң жобасын жемқорлыққа қарсы күрес агенттігі әзірлеген.

Заң жобасына сәйкес, бір мекемеде туған-туыстарға, құда-жекжаттарға жұмыс істеуіне тыйым салынады. Талапты бұзғандарға 375-750 долларға дейін айыппұл салу көзделген.

Саида Мирзияеваның жоғары лауазымды қызметке тағайындалуы Орталық Азия елдері басшыларының туыстары үшін бірінші жағдай емес. Былтыр Тәжікстан президенті Эмомали Рахмон үшінші қызы Рухшонды Ұлыбританияға елші етіп жіберген.

XS
SM
MD
LG