Партиянинг Фарғона вилояти Кенгашидан олинган маълумотга кўра, вилоят бўйича 23та штат ва уни эгаллаб турган ходимлар қисқартирилган.
Cайлов ўтиб бўлиши биланоқ қисқартирилиши ҳақида огоҳлантириш мактуби олган ходимларнинг айтишларича, бошқа бўш вакансиялар бўлишига қарамасдан, уларга бошқа иш топишлари сўралган.
Тадбиркорлар ва ишбилармонлар ҳаракати - Ўзбекистон Либерал-демократик партияси Фарғона вилояти Кенгаши аппарат раҳбари Ҳалимжон Раҳмонов Озодлик саволларига жавоб беришдан бош тортди.
ЎзЛиДеп Марказий кенгаши матбуот хизмати раҳбари Элмурод Панжиев штатлар қисқартирилиши ҳақидаги саволга жавоб беришга ожизлигини айтди.
Ўзбекистон Либерал-демократик партияси Фарғона вилояти Кенгаши ходимларидан Озодликка юборилган мактубда бундай деб ёзилган
"Инсон қадри учун" шиори остида ўтган йили сайлов ўтказдик.
Ватанпарварликми, фидойиликми билмадим, лекин сайлов жараёнида кечаю-кундуз, дам олишсиз ишладик.
Биз номзодимиз Ш.Мирзиёевнинг "Инсон қадри учун" ғоясига қаттиқ ишониб қолибмиз. Лекин, сайлов ўтиши билан ЎзЛиДеП партияси тизимида йирик штат қисқартирилиши бошланди.
Сайловда жонбозлик кўрсатган, "инсон қадри"ни тарғиб қилган ходимлар қадрсизланиб қолди.
Исми сир қолишини сўраган мактуб муаллифларидан бирининг айтишича, вилоят бўйича 23 нафар ходим қисқартирилган.
Ходимнинг айтишича, энг алам қиладигани сайлов ўтиши билан уларнинг кераксиз бўлиб қолганидир:
“Ўтган йилги президентлик сайловида кечаю кундуз ишладик. Марказий аппаратнинг ҳам хатоси шуки, эшаги лойдан ўтганидан сўнг, бизга шунақа ғайринсоний муомала қилди. Мафкуравий тарғибот бўлимини ҳам ёпишди. Сайлов ўтиб бўлди-да, энди тарғибот керак эмас. Янаги сайлов арафасида балки яна ташкил қилишар. Эркак ўқитувчиларимиз балки ўзларига бошқа иш топиб олишар, лекин аёл ходимларга қийин бўлди”.
Исми сир қолишини сўраган бошқа ходимнинг айтишича, у ишдан бўшатилганидан сўнг партия аъзолигидан ҳам воз кечган:
“Тўғри-да, ишлатиб-ишлатиб кўчага улоқтирадиган бунақа партиянинг кимга кераги бор. Қаранг, сайлов октябрда бўлди, орадан бир ой ўтмай 21 ноябрда қисқартирилишимиз ҳақида огоҳлантириш олдик. Хафа бўлдим, партия аъзолигидан чиқиш ҳақида ариза ёздим ва бошқа иш топдим”.
ЎзЛиДепнинг Фарғона вилоятининг туманларидан биридаги бўлими раҳбарининг айтишича, партияда ишлаш мансаб пиллапоясидан кўтарилиш учун асос вазифасини ўтайди:
“Партияда ишлаш бу карьера қилиш учун трамплин. Ҳокимиятга яқинлашиш, яхши лавозимларни эгаллаш учун кўпинча партиялардан номзодлар танланади. Партиядан ишдан кетган карьерачи бирданига икки орзусидан ажралади. Биринчиси яхши маош ва иккинчиси карьера трамплинидан маҳрум бўлиш. Шунинг учун карьера қилмоқчи бўлганлар тиш-тирноғи билан партияга ёпишади”.
Ўзбекистонда ўтган йили кутилганидек, иқтидордаги Либерал-демократик партия мамлакатнинг амалдаги давлат раҳбари Шавкат Мирзиёев номзодини яна бир муддатга президентликка илгари сурган ва сайлов натижаларига кўра Мирзиёев ғолиб бўлган эди.
2021 йилдаги президент сайловига жами 300 млрд сўм, сиёсий партияларнинг ташвиқот ва тарғиботи учун 15 млрд 486 млн сўм, ҳар бир номзодга эса — 3 млрд сўмдан ажратилган эди.
Ўзбекистон Либерал Демократик партиясининг Фарғона вилоят фаоллари ўшанда президентликка номзод Шавкат Мирзиёевнинг номзодини қўллаб-қувватлаш учун имзо йиғишда ортиқча талаб қўйилаётганидан шикоят қилган эдилар.