Ссылки доступа

Перуда оммавий норозилик намойишлари туфайли фавқулодда ҳолат эълон қилинди


Перунинг янги ҳукумати президент Педро Кастилёга импичмент эълон қилинганидан кейин мамлакатда бошланган оммавий норозилик намойишларига жавобан 30 кунлик фавқулодда ҳолат эълон қилди.

Бу ҳақдаги фармон Перу ҳукумати йиғилишида қабул қилинди. Ҳужжатга кўра, перуликлар бир ой давомида мамлакат бўйлаб эркин йиғилиш ва ҳаракатланиш ҳуқуқидан маҳрум қилинган. Полицияга ҳарбийлар кўмагида суд қарорисиз уйларни тинтув қилишга рухсат берилган. Бундан ташқари, ҳукумат тунги комендантлик соати жорий этиш масаласини муҳокама қилмоқда.

Перу мудофаа вазирининг сўзларига кўра, кўрилган чоралар тартибни сақлаш, минглаб оилалар ва мамлакат иқтисодиётини ҳимоя қилишга қаратилган.

Перуда норозилик намойишлари ўтган ҳафта мамлакат Конгресси президент Педро Кастилёга импичмент эълон қилинганидан кейин бошланган. Кастилё Конгрессни тарқатиб юборишга ҳаракат қилди, лекин у Кастилёнинг истеъфоси учун овоз берди. Ҳозир у ҳокимиятни суиистеъмол қилиш ва давлат тўнтаришига уринишда айбланиб, ҳибсда. Унинг ўрнини собиқ вице-президент Дина Болуарте эгаллади.

Намойишчилар Кастилёнинг озодлиги, Болуартенинг истеъфоси ва муддатидан олдин умумий сайловлар ўтказилишини талаб қилиб, кўчаларни тўсиб, аэропортларни фалаж қилмоқда. Шунингдек, бир қанча полиция, вилоят прокуратураси ва солиқ идоралари ёқиб юборилгани айтилмоқда. Полиция билан тўқнашувлар чоғида камида саккиз киши, жумладан бир неча ўсмир отиб ўлдирилган, йигирмадан ортиқ киши яраланган.

Болуарте умумий сайлов 2023 йил декабрига белгиланиши мумкинлигини айтди. У аввалроқ президентлик лавозимида 2026 йилгача, яъни Кастилёнинг ваколати расман тугагунига қадар қолиш ниятида эканини айтганди.

Педро Кастилё 2021 йил июнь ойида 51,2 фоиз овоз билан Перу президенти этиб сайланган эди. Ўшандан бери Конгресс унга икки марта импичмент эълон қилишга уринди - фақат учинчи уриниш муваффақиятли бўлди.

Дина Болуарте Перунинг биринчи аёл президенти бўлди.

XS
SM
MD
LG