Украина президенти Владимир Зеленский 26 февраль куни Киевда Озод Европа/Озодлик радиоси (RFE/RL) медиа корпорацияси президенти Стивен Капус билан учрашди.
Зеленский ва Капус, хусусан, Россия босқини шароитида Украинадаги журналистларнинг фаолиятини муҳокама қилди.
Украина президенти халқаро ОАВ, хусусан, Озодлик радиосининг Украинадаги урушни ёритишини юқори баҳолади. Зеленский ва Капус, шунингдек, Озодлик радиоси украин хизмати журналисти Владислав Есипенко тақдирини муҳокама қилишган. Есипенко уч йилдан бери қўшиб олинган Қримда уйдирма айбловлар билан ҳибсда сақланмоқда.
"Бу муҳим он: Россия босқинининг учинчи ва Украина ҳудудларини ноқонуний тарзда қўшиб олишининг ўнинчи йилидир. Озодлик радиосининг вазифаси - Украинада содир бўлаётганларни дунёга кўрсатиш, ҳақиқатни ошкор этиш ва украин халқининг буюк жасорати ва бардамлигини намойиш қилиш”, деди Капус. У, шунингдек, Есипенкони озод қилишга чақирди. Зеленскийнинг айтишича, Украина ҳукумати барча украиналикларни, айниқса қримликларни ва журналистларни ватанларига қайтариш устида ишламоқда.
Россия Адлия вазирлиги 2022 йилда Озод Европа/Озодлик радиоси (RFE/RL)ни мамлакатда фаолият кўрсатиши исталмаган хорижий нодавлат ташкилотлари рўйхатига киритди.
RFE/RL мустақил медиаширкат бўлиб, у АҚШ Глобал медиа агентлиги воситасида Конгресс ажратадиган грант маблағлари ҳисобига фаолият юритади.
RFE/RL асосан матбуот эркинлиги чекланган 23 давлат учун 27 тилда ахборот беради.
Владимир Зеленский Озодлик радиоси президенти Стив Капус билан учрашди
RFE/RL асосан матбуот эркинлиги чекланган 23 давлат учун 27 тилда ахборот беради.