ДДТ рок-гуруҳи етакчиси Юрий Шевчук Остонада бўлиб ўтган концертида "Эркинлик" қўшиғини марҳум Алексей Навалний хотирасига бағишлади.
Шевчук қўшиқни ижро этишдан олдин томошабинларга мурожаат қилди: "Қуёш чиқади. Ўтган куни Алексей Навалний ҳалок бўлди. У бизга, россияликларга, эркинлик муждасини берди.Том маънода эркин бўла олишимизни эслатди. У эрксиз иймон - ақидапарастлик, эрксиз меҳнат - қуллик, эрксиз муҳабббат -зулм эканлигини айтарди. Эркинликсиз ҳамма нарса қора рангга бўялади".
Шевчук аввалроқ ҳам сиёсий маҳбусларни ва хусусан, Алексей Навалнийни қўллаб-қувватлаб чиққан. У Навалнийни келажакда Россия президенти сифатида кўришни исташини айтган.
Шевчук Россиянинг Украинага тажовузини, Владимир Путиннинг бу борадаги сиёсатини ҳам очиқчасига қоралаган. Бунинг оқибатида ДДТ гуруҳининг барча концертлари бекор қилинган, Шевчукнинг ўзи эса Россия Қуролли Кучларини обрўсизлантиришда айбланиб, жаримага тортилган.
Ҳозирда ДДТ онда-сонда фақатгина хорижга чиқиб концерт бермоқда. Юрий Шевчук Россияда яшайди.