Украина президенти Владимир Зеленский Тбилисидан Грузия собиқ президенти Михаил Саакашвилига Украинада даволанишга рухсат беришни талаб қилди. Зеленский Украина Ташқи ишлар вазирлигига Грузиянинг Киевдаги элчисини чақиртиришни ва унга бу масалада маслаҳатлашув ўтказиш учун 48 соат ичида Тбилисига жўнаб кетиши шартлигини билдириш топшириғини берди.
Саакашвили 3 июль куни Тбилисида ўзига нисбатан ўтказилган навбатдаги суд мажлисида «Вивамед» клиникасидан туриб видеоалоқа орқали иштирок этди. Видеода Саакашвилининг ўта озиб кетганини кўриш мумкин.
Озодлик радиоси грузин хизматининг хабар беришича, Саакашвили суддаги нутқини украин тилида бошлаган, шундан сўнг у парламент раиси Шалве Папуашвилига сиёсий баёнот билан мурожаат қилди. Собиқ президент баёнотида «ўзини шу даражага олиб келишгани учун» узр сўрашни талаб қилди.
Мазкур видеодан сўнг Зеленский ўз твиттер саҳифасида: «Россия Украина фуқароси Михаил Саакашвилини грузин ҳукумати қўли билан ўлдирмоқда», - деб ёзди. Зеленский Саакашвилини Украинага қайтаришни бир неча маротаба илтимос қилганини, Ғарб давлатлари ҳам бу масалада ўз таклифларини берганларини эслатди.
2021 йил октябрида Саакашвили Грузия чегарасидан яширинча ўтганликда гумонланиб Тбилисида қўлга олинган эди. Шундан сўнг у президентлик даврида ваколатларини суиистеъмол қилганлик айблови билан олти йилга қамалди. Грузияда унга қарши яна бир нечта иш қўзғатилган. Улар орасида чегарадан ноқонуний ўтганлик айблови ҳам бор. Май ойида соғлиғи ёмонлашган собиқ президент клиникага кўчирилганди.
2004-2013 йилларда Грузия президенти бўлган Саакашвили ва мухолифат жиноят ишлари сохталаштирилганини айтиб келади. У қамоқхонада норозилик сифатида бир неча марта очлик эълон қилган. Саакашвили Грузия ҳукумати уни ўлдириш ниятида эканини иддао қилиб келади. Грузия ҳукумати эса Саакашвилинининг бу айбловларини инкор этиб, уни симуляция қилаётганликда гумонламоқда.