Одесса вилояти ҳарбий бошқармаси ракета зарбаси оқибатида Одесса порти ҳудудидаги дон ва нефть терминаллари зарар кўрганини маълум қилди.
“Бу оқшом Россия терроридан энг кўп жабр кўрган порт терминалида Хитойга жўнатиш учун мўлжалланган 60 минг тонна қишлоқ хўжалиги маҳсулотлари сақланаётган эди. Дунёда ҳамма Россияни террор учун жавобгарликка тортишдан манфаатдор бўлиши керак”, — деди Зеленский.
Унинг қўшимча қилишича, 19 июлга ўтар кечаси қилинган ҳужум Россиянинг “Одессага зарар етказишга энг катта уринишидир”. Зеленскийнинг сўзларига кўра, зарба нишони фақат Украина бўлмаган, чунки ҳужумга учраган портларда Африка ва Осиё мамлакатларига жўнатиш учун мўлжалланган миллион тоннага яқин озиқ-овқат сақланади.
18 ва 19 июль кунлари Россия қўшинлари Украинанинг жанубий вилоятларига, жумладан Одессага ракеталар ва камикадзе дронлари билан ҳужум қилди. Украина Қуролли кучларининг “Жануб” оператив қўмондонлиги Одесса портларидан бирида дон ва нефть терминаллари шикастланганини маълум қилди. Украина аграр сиёсат ва озиқ-овқат вазири Николай Солскийнинг айтишича, 19 июлга ўтар кечаси ғалла битимига алоқадор порт объектлари ўққа тутилган. Оқибатда Черноморск портига юкланиши керак бўлган 60 минг тонна дон йўқ қилинган.
Россия расмийлари Одессанинг 18 июль кунги ўққа тутилишини Қрим кўпригидаги портлаш учун “жавоб зарбалари” деб атади.