Ба иттилои манбаи бахши ӯзбекии Радиои Озодӣ, барои таҳқиқи парвандаи Аҳмадбой, ки ҳаҷмаш бузург аст, аз ноҳияи дигари Тошканд муфаттишон ҷалб шудаанд.
Шабакаҳои телевизиони Ӯзбекистон рӯзи 16 июн гуфтанд, аз манзили Аҳмадбой 7,9 миллион доллари амрикоӣ ва ҷузвдонҳои пур аз тило пайдо кардаанд.
То ҳоло беш аз 20 ҳазор кас зидди Аҳмадбой ариза навиштааст.
Ёдрас мешавем, 15 июн як гуруҳи ниқобпӯш ба коргоҳои Аҳмад Турсунбоев, соҳибкори 38-солаи ноҳияи Чинози Ӯзбекистон , маъруф бо номи "Аҳмадбой" ҳамла карданд. Худи соҳиб кор ҳам он замон боздошт шуд.
Ширкати "Чиноз Авто Ҳамкор"-и Аҳмадбой аз одамон пул гирифта, ваъда мекардааст, ки ҳамасола то 100% даромад мепардозад. Ҳоло ин соҳибкор ба чандин ҷиноят, аз ҷумла қаллобӣ ва тамаъҷӯӣ айбдор мешавад.