Ба далели камбуди сармоя барномаи Бозиҳои паролимпӣ дар Рио, ки аз 7 то 18 сентябр барпо хоҳанд шуд, мумкин аст ихтисор гардад, менависад нашрияи Wall Street Journal. Аммо ҳоло дақиқ нест, ки кадом навъи варзиш то чӣ ҳад ихтисор мешавад.
Ба гуфтаи котиби матбуотии Кумитаи байналхалқии паролимпӣ Крейг Спенс, ташкилкунандагони бозиҳо дар Рио натавонистанд, ки маблағи 7,4 млрд. реал (2,3 миллиард доллар)-ро ҷамъ биоранд. Ин миқдор маблағ барои баргузории ҳар ду навъи бозӣ - ҳам Олимпӣ ва ҳам Паролимпӣ кифоят мекард.
Ба ҷуз ин, Кумитаи тадорукоти Бозиҳои 2016 натавонист, ки барои овардани тимҳои паролимпӣ ба Рио сари вақт маблағҳоро ба кишварҳо интиқол диҳад.
Ба ҳамин далел, ташкилкунандаҳо сари ин андешаанд, ки чӣ гуна шумори мусобиқаҳо ва ширкатдоронро дар Паролимпиада кам кунанд. Интизор мерафт, ки дар Паролимпиада бештар аз 4 ҳазор варзишгар аз 176 кишвар ширкат кунанд.