Америка жана Түштүк Кореянын маалыматы боюнча ракета 500 чакырым учуп барып, сууга кулаган. Бул сыноо суу алдында жайгашкан ракеталарды иштеп чыгуудагы жетишкендиктен кабар берерин Reuters агенттигине Түштүк Кореянын өкүлдөрү билдирди. Буга чейинки эки сыноодо ракеталар учпай эле дароо сууга түшүп калышкан болчу.
Түштүк Корея жана Жапония ракета сыноосун айыптады. Жапония премьер-министри Синдзо Абэ Түндүк Корея мындай кадамы менен анын өлкөсүнө коркунуч жаратып жатканын айтты. Сыноо БУУнун Коопсуздук Кеңешинин резолюциясын бузуу менен ишке ашты. Документте Пхеньянга баллистикалык ракеталарды иштеп чыгууга тыюу салынган.
Эки күн мурун АКШ жана Түштүк Корея жыл сайын өтүүчү биргелешкен машыгууларын баштаган. Муну Түндүк Корея кол салууга аракет катары баалаган. БУУнун Коопсуздук Кеңешине жолдогон катында Пхеньян эки өлкө Түндүк Кореяга алдын ала эскертүүчү ядролук курал кое берүүгө даярданып жатканын билдирген.