Ссылки доступа

Тажик түрмөлөрүндө жаткан 500дөй адам эркиндикке чыкты


Эки күн аралыгында эле Тажикстандагы абактардан 500дөн ашуун адам эркиндикке чыкты.

Тажикстан Юстиция министрлиги билдиргендей, мунапыс менен Нурек аялдар колониясынан 130дай аял, Яван түрмөсүнөн 400дөн ашуун камактагылар боштондукка чыкты. Мындан тышкары жашы жете электердин колониясынан дагы белгилүү бир сандагы өспүрүмдөр азаттык алды.

Тажикстандын көз карандысыздыгынын 25 жылдыгына карата "Мунапыс жөнүндөгү" мыйзамды президент парламентке сунуштаган. Өткөн жумада демилгени депутаттар колдоп беришкен. Аталган мыйзамга ылайык, 12 миңден ашуун адамдын кылмыштары мунапыс менен жоюлуп, 3 миңдей камактагы киши эркиндикке чыгат.

Адам өлтүргөндөр, конституциялык түзүмгө жана мамлекеттин коопсуздугуна каршы кылмыш жасагандар, терроризм, экстермизм үчүн соттолгондор мунапыска илинбейт.

“Мунапыс жөнүндөгү” мыйзам чет өлкөдө издөөдө жүргөн, бирок оор кылмыш жасабаган адамдарга карата дагы колдонулат.

XS
SM
MD
LG