13-сентябрда орусиялык телеканалдарга сүйлөп жатып Донецктеги жикчилдердин лидери Александр Захарченко тынчтык режими 15-сентябрга оогон түнү башталарын айтты. Захарченко Киевди да ушул кадамга барууга чакырды.
Ал эми Лугансктагы жикчилдердин лидери Игорь Плотницкий да ушундай билдирүү таратты.
Орусия колдогон жикчилдердин лидерлери алгач ирет бир тараптуу ок атууну токтотууну демилгелешүүдө.
Буга бир нече саат калганда Украина президенти Петр Порошенко Конституцияга өзгөртүү киргизүү боюнча Жогорку Радада добуш берүү болорун, ага ылайык, өлкөнүн чыгышындагы облустарга автономия берилерин айткан.
Украинанын чыгышында 2014-жылдын апрелинен бери өкмөт менен жикчил күчтөрдүн согушунан 9500дөн ашуун адамдын өмүрү кыйылды.