Энди партиялар ва ўз номзодини кўрсатганлар йиғин ва йиғилишларда номзодларини кўрсатишлари ва Марказий сайлов комиссиясига ҳужжатларни тақдим қилишлари мумкин. Ўз номзодини кўрсатганлар рўйхатга олинишлари учун300 минг сайловчининг, партиялардан кўрсатилганлар эса 100 минг сайловчининг имзосини тўплаши керак бўлади. Парламентдаги партияларнинг номзодлари имзо тўплашдан озод қилинади.
Душанбадан бошлаб президентлик сайловларини ташкиллаштириш ва ўтказиш учун Марказий Сайлов комиссиясига федерал бюджетдан маблағлар туша бошлайди. РИА Новости тарқатган хабарларга кўра, бу мақсадлар йўлида бюджетидан салкам 15 миллиард рубл ажратилади.
МСК раҳбари Элла Памфилованинг айтишича, президентлик учун курашда иштирок этиш ниятини 23 киши билдирган. Президентлик сайловларида амалдаги давлат раҳбари Владимир Путиндан ташқари ЛДПР етакчиси Владимир Жириновский, «Яблоко» партияси асосчиси Григорий Явлинский, телебошловчилар Ксения Собчак ва Екатерина Гордон, тадбиркор Сергей Полонский, бизнес-омбудсмен Борис Титов ва мухолифатчи Алексей Навальний иштирок этиш ниятини билдирган. Бироқ расмийлар А.Навальний «Кировлес» иши бўйича айблов ҳукми туфайли ўз номзодини қўйиш ҳуқуқига эга эмаслигини айтмоқда. Ҳозирча КПРФ ва "Справедливая Россия" (“Адолатли Россия”) партиялари кимнинг номзодини кўрсатиши аниқ эмас.
Президентлик сайловлари 18 март – Қримнинг Россияга “қўшилганлиги” тўғрисидаги Шартнома имзоланган кунга белгиланган. ОАВнинг ёзишича, сайловчилар иштирокини кўпайтириш мақсадида Кремл бу мавзуни Владимир Путиннинг сайловолди кампаниясида кўтариб чиқмоқчи.