Муассасанинг айтишича, 15 нафар жангчи шифохонага ётқизилди.
"Биринчи тиббий хизмат кўрсатишдан сўнг 45 нафар жангчи ўзларининг хизмат вазифаларини бажаришни давом эттирди,15 нафари эса шифохонага ётқизилди - 13 нафари газдан заҳарланди,1 нафари юзидан жароҳат олди, 1 нафари эса бошидан жароҳатланди (жангчининг қишки курткасига портловчи халта улоқтиришди, бироқ унда муҳофаза воситаси ва шлем бўлгани боис, жиддий зиённинг олди олинди)”, дейилади муассаса хабарида.
Куни кеча Киевда Грузия собиқ президенти, Украинадаги “Янги кучлар исёни” муҳолифат ҳаракати етакчиси Михаил Саакашвили президент Петр Порошенконинг импичментини талаб қилиб навбатдаги марш ўтказди. Маршдан сўнг улар Октябрь санъат саройига киришга уринди. Саакашвилининг айтишича, унга ва маршнинг бошқа ташкилотчиларига саройда иккита хонани ижарага олиб мажлис ўтказиш мумкинлиги ҳақида айтишган. Бироқ, одамлар бинога яқинлашганларида “уларни полиция отрядлари кутиб олди. Полиция томонидан махсус мосламалар - кўздан ёш оқизувчи газ ва шовқинли гранаталар қўлланилди”, - дея баёнот берди Саакашвили.
Намойишчилар бинога киришга уринишди ва кириш эшигининг ойналарини синдиришди, бироқ махсус кучлар томонидан тўхтатиб қолинди. Намойишчилар томонидан жароҳат олганлар ҳақида маълумот берилмади.
Саакашвили ҳодисани “иғво” дея атади ҳамда ўзи ва тарафдорлари “норозиликнинг тинч йўлини танлашганини ва Октябрь саройи яқинидаги иғвони олдини олишга уринганини” айтди. У тарафдорларига мурожаат қилар экан, маъмурий биноларга яқинлашмасликларини, эшик ва деразаларни синдирмасликларини сўради.
Украина миллий полицияси раҳбари Сергей Князев якшанба куни кечқурун баёнот бериб, Октябрь саройи эгалланаётган бир вақтда у ерда болалар байрами (бошқа маълумотда - жаз концерти) бўлаётганини, бинони эгаллаб олишга бўлган уриниш факти бўйича жиноий иш очилганини маълум қилди. Саакашвили душанба куни кўрсатма бериш учун Украина бош прокуратурасига чақирилди.