Қанатбек Исаев ҚР Жиноят кодексининг 303 (коррупция) моддасининг иккита эпизоди (муниципал бозор ва автобекат қурилиши) бўйича айбдор деб топилди ва мол-мулки мусодора қилиниши билан 12 йил озодликдан маҳрум қилинди, ҳамда уч йил муддатга давлат лавозимларида ишлаш ҳуқуқидан маҳрум этилди, бошқа иккита эпизод бўйича у оқланди.
Судья Абдуразақ Боромбаевнинг сўзларига қараганда, Муваққат ҳукуматнинг 2010 йилги тегишли декретига мувофиқ Қанатбек Исаевнинг ўталмай қолган муддати тўртдан бирга қисқартирилди.
Исаевнинг адвокати Сергей Слесаревнинг айтишича, бозор ва автобекат қурилиши борасидаги қарор Тоқмоқ шаҳар кенгаши томонидан қабул қилинган, шу сабабли айблов ҳукми ўзи учун ғалати бўлди. Унинг сўзларига кўра, қарор адолатли бўлишига умид қилган ва Исаев оқланишини кутган. Ҳимоя ҳукм юзасидан юқори суд инстанцияларига шикоят қилишини билдирди.
Жўқўрғу Кенешнинг “Қирғизистон” фракциясидан депутати 2009-2010 йилларда Тоқмоқ шаҳридаги ер участкаларни қонунга зид равишда сотганликда айбланмоқда –ўшанда у шаҳар мэри бўлиб ишларди. Унга нисбатан жиноий иш 2017 йилнинг май ойида ҚР ЖК303 («Коррупция») моддаси бўйича очилган эди.
Бундан ташқари, 2017 йилнинг 30 сентябрида Қанатбек Исаевга нисбатан иккинчи жиноий иш очилди – у “ҳокимиятни куч билан эгаллаб олишга уриниш”да гумон қилинди. Первомай туман суди 2 октябрь куни парламент аъзосини тергов тугагунига қадар ҳибсда ушлаб туриш борасида қарор қабул қилди. Тергов 30 ноябрда тугаши керак эди. Шундан сўнг ҳибсда ушлаб туриш муддати 2018 йилнинг 30 январига қадар узайтирилди. Мазкур иш бўйича суд жараёни учун алоҳида иш юритиш белгиланди.