Воқеа гувоҳларига кўра, ўқувчини бу уйга коллеж ўқувчиси бўлган 2 ўртоғи олиб борган. Денов шаҳридаги Меҳр-оқибат маҳалласида истиқомат қилган, муқаддам фоҳишахона сақлашда айланиб судланган, икки нафар фарзанднинг онаси, 27 яшар Д.А. 80-умумтаълим мактабининг 9-синф ўқувчисини Б.Э.ни ўз уйининг подъездида пичоқлаб ўлдирганликда айбланяпти.
Ёшлар иттифоқи ташкилотининг Денов туманидаги фаолларидан бирига кўра, унинг бу фожиага бевосита гувоҳ бўлган танишининг гапига таяниб айтишича, болалар Д,А.нинг уйига жинсий эҳтиёжини қондириш учун келган. “Ўша куни у яна бир ўртоғи ва 9-синфда ўқийдиган танишини ҳам ўша уйга олиб борган. Кейин ичкарида фоҳиша талашиб, жанжал чиққан ва бояги мактаб ўқувчиси "Мама Роза" ни (фоҳишахона сақловчиларга нисбатан қўлланиладиган умумий ном -таҳр.) онасидан сўккан. "Мама Роза" эса, ошхона пичоғини у боланинг юрагига санчиб олган”, - деди ташкилот фаоли.
Қотилликда айбланаётган аёлнинг қўшниларидан бири аёлнинг илгари ҳам уйида фоҳишахона очганлиги учун жарима тўлаганини таъкидлади. "Айтишларича, бола уйдан қочиб чиққанда орқасидан қувиб, подъездда ушлаб олиб пичоқ тиққан экан. Подъезд тўла қон бўлди. Ҳозир ҳам деворда излари қолган", - деди қўшнилардан бири.
Айни пайтда аёлга нисбатан Ўзбекистон Жиноят Кодексининг 97- моддаси (Қасддан одам ўлдириш) билан жиноят иши қўзғатилган ва тергов давом этяпти.