Тожикистон «Азия-Плюс» мухбири Тожикистон ҳукуматидаги манбага асосланиб хабар беришича, яқин вақт ичида икки республика ўртасида «Фуқароларнинг ўзаро ташрифлари тўғрисида»ги янги ҳужжатни имзолайди. Унга асосан икки мамлакат фуқаролари Ўзбекистон ва Тожикистон ҳудудида визасиз бир ойга қадар юришлари мумкин бўлади.
Аввал хабар қилинганидек, Ўзбекистон бош вазири Абдула Ариповнинг Душанбеда президент Эмомали Раҳмон билан бўлиб ўтган учрашуви чоғида томонлар ватандошларнинг чегарадан ўтишига қўйилган чекловларни бекор қилиш, икки давлат ўртасидаги миналаштирилган ҳудудларни тозалаш каби масалаларни кўриб чиққан.
Тожикистон билан чегарадаги пиёдаларга қарши миналар ўзбек чегарачилари томонидан 1999 йили Ўзбекистон Исломий Ҳаракати жангариларининг Сурхондарё вилояти орқали мамлакат ҳудудига ёриб кириши олдини олиш учун кўмилган.
Тожикистон Мина масалалари бўйича марказининг маълумотига кўра, 1999 йилдан 2011 йилгача чегарадаги миналардан 160 дан зиёд одам жабр кўрган, улардан 76 нафари ҳаётдан кўз юмган.