Бу ҳақда 13 январь куни ҳалок бўлганлар хотирасига ўрнатилган ёдгорликнинг очилиш маросимида жабрдийдалар ва ҳалок бўлганларнинг оиласига ёрдам кўрсатиш идоралараро ишчи гуруҳининг раҳбари Мухамметкалий Абулғазиев маълум қилди.
Унинг сўзларига қараганда, бу ишни ўрганаётган терговнинг илк маълумотларига кўра, фожеага учувчиларнинг хатоси сабаб бўлган. Бироқ, у бу якуний хулоса эмаслигини, фожеа сабабларини ўрганаётган халқаро комиссия ўз ишини давом эттираётганини таъкидлаб ўтди.
Эслатиб ўтамиз, 2017 йилнинг 16 январь куни Гонконгдан Истанбул томон парвоз қилаётган Туркиянинг ACT Airlines (MyCargo) авиакомпаниясига тегишли Boeing-747-400F самолёти қўниш вақтида “Манас” аэропортига яқин Дачи-СУ боғдорчилик-дача участкасига қулаб тушган эди.
Авиаҳалокат оқибатида 39 киши - Туркия фуқаролари бўлмиш 4 нафар экипаж аъзоси ва 35 нафар Қирғизистон фуқароси ҳалок бўлди. Яна бир қирғизистонлик жабрдийдаларга ёрдам кўрсатиш вақтида табиий сабабларга кўра вафот этди.
Расмий маълумотларга кўра, қишлоқда 19та уй бутунлай вайрон бўлди, 7 та уй эса авария ҳолатида дея тан олинди. 12та уй қисман вайрон бўлди.