“Озодлик”нинг Дашоғуздаги манбасининг айтишича, иқтисодий жиноятларга қарши кураш Хизмати вилоятда хавфсизлик хизматининг бир нечта офицерини порахўрлик ва гиёҳванд моддалар савдогарларига кўмаклашиш айби билан ҳибсга олди.
“Озодлик” радиосининг бир-биридан мустақил бўлган манбаларнинг маълум қилишича, хавфсизлик хизмати ва полиция ходимларининг маълум улушга эга бўлиш мақсадида ноқонуний равишда алкоголь, тамаки ва гиёҳванд моддалар сотиш билан шуғулланувчиларбилан ҳамкорлик қилиб келиш тажрибаси мавжуд.
Хабарларга кўра, коррупция айби билан Ашхабоднинг Копетдоғ тумани солиқ инспекцияси бошлиғи ва бир неча ходим ҳибсга олинган. “Копетдоғ пойтахтнинг энг катта ва аҳолиси гавжум туманларидан биридир, шу сабабли бу ерда кичик, ўрта бизнес вакиллари, жумладан хорижий тадбиркорлар маълум устунликларга эга. Солиқ инспекцияси бошлиғи катта миқдорда пора олганликда айбланмоқда”, - дейди ўз исмини ошкор қилишни истамаган “Озодлик” манбаси.
2017 йилнинг октябрь ойи сўнгида Туркманистон президенти Давлат Хавфсизлик Кенгаши мажлисида давлат аппаратида коррупцияга қарши курашда зарур чоралар кўришга чақирган эди. Яқинда бир нечта судья ва прокурорлар эгаллаб турган лавозимларидан озод қилинди ва порахўрликда айбланиб ҳибсга олинди.