"Россия бизга Шимолий Кореяга қарши курашда умуман ёрдам бермаяпти", - деди Трамп Оқ уйнинг овал хонасида Reuters агентлигига берган интервьюсида. "Хитойнинг бизга бераётган ёрдамларини Россия саботаж қилмоқда, бошқача айтганда, Хитой қилмаётган ишларни Россия тўлдирмоқда" – деди Трамп.
Хитой ва Россия ўтган йилда БМТ Хавфсизлик Кенгаши томонидан Шимолий Кореяга қўлланилаётган сўнги санкцияларга рози бўлди. Ўз интервьюсида АҚШ президенти Шимолий Кореяни бу йил Трамп олдида турган бош глобал муаммо сифатида таърифлади. У Шимолий Корея етакчиси билан бўладиган музокараларнинг самара беришига шубҳа билан қарашини таъкидлаб ўтди. Ўтган йили у Ким билан тўғридан тўғри музокаралар олиб бориш эҳтимоли ҳақида гапирган эди.
"Мен у билан (музокаралар учун) ўтираман, бироқ бу муаммоларни ҳал қилишига ишонмайман", - деди у ва ўзининг ўтмишдошлари Шимолий Корея билан олиб борган музокаралари Шимолий Кореянинг ядровий ва ракета дастурларини чеклай олмаганини эслатиб ўтди. Трампдан минтақада кескинликка сабаб бўлаётган ошкора ҳақорат ва таҳдидлар билан бир-бирларига мурожаат қилишдан ташқари Ким билан мулоқот қиласизми, дея сўрашганида, у бу ҳақда гапиришни истамади. Трамп Пхеньян билан қарама қаршликларни "тинч йўллар билан ҳал қилишга” умид қилишини айтар экан, “бунинг имкони бор, балки ҳаддан зиёд имкони бор, шу билан бирга имконсиз”, деди.