Эҳтимоли тағйир ёфтани нархи бензин аз 1 феврал ҳам вуҷуд дорад. "Хабарҳо гуногунанд. Баъзеҳо мегӯянд, аз фардо нарх боло меравад. Дар тамоми нуқтаҳои фурӯши сӯзишворӣ навбатпоиҳо дида мешавад. Мардум ба ҳангома дода шудаанд", - афзуд як манбаъ аз Ишқобод.
"Аз назди нуқтаи фурӯши сӯзишворие дар маҳаллаи 30-ум мегузаштам, дидам 60-70 мошин навбат истодаанд. Сокинон мегӯянд, далели ба миён омадани навбатпоиҳоро худи кормандони нуқтаҳои фурӯш ҳам намедонанд. Онҳо гуфтаанд, касе ба гароншавии нархи бензин аз фардо дастур надодааст", - гуфт як манбаи дигари мо аз пойтахти Туркманистон.
Дар Туркманистон бори охир бензин моҳи январи соли 2015 гарон шуда буд. Он замон бо дастури раҳбарияти кишвар нархи бензинро 60% боло бурда, арзиши бензини навъи А-95 1 манат ва А-92 94 танга муайян карда шуд (қурби расмии 1 доллари ИМА дар Туркманистон 3,5 манат аст).